இது மக்களுக்கான ஆட்சியா அல்லது மக்களை வதைக்கும் ஆட்சியா? என தமிழக பாஜக மாநில தலைவர் நயினார் நாகேந்திரன் தெரிவித்துள்ளார்.
இதுதொடர்பாக அவர் விடுத்துள்ள பதிவில், கடலூர் மாவட்டம் புகளூர் பகுதியின் நகராட்சி குழாயில் தண்ணீர் வரவில்லை என்று புகார் எழுப்பிய ரவி என்பவரின் வீட்டிற்கே சென்று அவர் மீது கடும் தாக்குதல் நடத்திய, புகளூர் நகராட்சி 15 வது வார்டு திமுக கவுன்சிலரின் கணவரும், திமுக மாவட்ட சிறுபான்மை அணியின் அமைப்பாளருமான நவாஸ்கான் அராஜகத்தை வன்மையாகக் கண்டிப்பதாக தெரிவித்துள்ளார்.
பாதிக்கப்பட்டவரை நேரில் சென்று சந்தித்து தைரியம் கூறிய கரூர் மாவட்ட பாஜக நிர்வாகிகளை மன நிறைவுடன் பாராட்டுகிறேன். தங்கள் பகுதியின் அடிப்படைத் தேவை குறித்து குரலெழுப்பியவரின் வீட்டிற்கே அடியாட்களுடன் சென்று தாக்குதல் நடத்துமளவிற்கு திமுகவினருக்கு துணிச்சல் எங்கிருந்து வந்தது? என அவர் கேள்வி எழுப்பியுள்ளார்.
இதுகுறித்து காவல்நிலையத்தில் புகாரளித்த பிறகும் எந்தவித நடவடிக்கையும் எடுக்காமல் சம்பந்தப்பட்ட திமுகவினரைக் காப்பாற்றத் துடிக்கும் ஏவல்துறை தமிழகத்தின் பெருத்த அவமானம். தங்களின் அதிகாரத்தைப் பயன்படுத்தி பொதுமக்களை அடிமைகளைப் போல நடத்தும் அறிவாலயத்தின் ஆணவத்தை ஒருநாளும் அனுமதிக்க முடியாது.
எனவே, கவுன்சிலர் பதவியைக் கையில் வைத்திருப்பதால் அத்துமீறிய நவாஸ்கான் மீது உடனடியாக கடும் நடவடிக்கை எடுக்க வேண்டுமெனவும், பாதிக்கப்பட்ட ரவி அவர்களின் குடும்பத்தாருக்கு தக்க இழப்பீடு வழங்க வேண்டுமெனவும் முதல்வர் ஸ்டாலினை நயினார் நாகேந்திரன் வலியுறுத்தியுள்ளார்.
