எலான் மஸ்க்கின் பிரபல மின்சார கார் தயாரிப்பு நிறுவனமான டெஸ்லா தனது புதிய தலைமுறை Roadster என்ற பறக்கும் ஸ்போர்ட்ஸ் காரை அதிகாரப்பூர்வமாக அறிமுகப்படுத்தியுள்ளது. நீண்ட காலமாக எதிர்பார்க்கப்பட்ட இந்தப் பறக்கும் Roadster கார் குறித்து செயல் விளக்க வீடியோவையும் டெஸ்லா பகிர்ந்துள்ளது. அது பற்றிய ஒரு செய்தி தொகுப்பு.
உலகின் மிகப் பெரிய தொழில்நுட்ப கண்டுபிடிப்பாளர் என்று பாராட்டப்படும் எலான் மஸ்க் உலகின் பெரும் பணக்காரர்களில் ஒருவராக திகழ்கிறார். சர்வதேச வாகனத் துறையில் அவரது ‘டெஸ்லா’ நிறுவன மின்சார கார்கள் ஆதிக்கத்தைச் செலுத்திவருகிறது.
தற்போது ஒட்டுமொத்த உலகத்தையே வியப்பில் ஆழ்த்தும் வகையில் தனது Tesla Roadster என்ற புதிய பறக்கும் காரை அறிமுகப்படுத்தியுள்ளார்.
டெக்சாஸின் மெக்ரிகோரில் உள்ள ஸ்பேஸ்எக்ஸ் மையத்தில் கடந்த வியாழக்கிழமை நடைபெற்ற நிகழ்வில், அறிமுகப்படுத்தப்பட்ட இந்த Tesla Roadster பறக்கும் கார் உலகெங்கிலும் உள்ள கார் பிரியர்களிடையே பெரும் வரவேற்பையும் எதிர்பார்ப்பையும் ஏற்படுத்தி உள்ளது.
கடந்த 2017ல் தனது ரோட்ஸ்டர் கார் மாடலை முதல்முறையாக காட்சிப்படுத்திய டெஸ்லா நிறுவனம், சுமார் 9 ஆண்டுகளுக்குப் பிறகு முதல்முறையாக காட்சிப்படுத்தப்பட்டுள்ளது.
டெஸ்லா வெளியிட்டுள்ள காற்றில் பறக்கும் திறன் கொண்ட காரின் அதிரடி செயல் விளக்க வீடியோவில், புதிய Tesla Roadster பறக்கும் கார் ராட்சத வளைவுப் பாலமொன்றில் செங்குத்தாக ஏறி தலைகீழாக புரண்டு காற்றில் பறந்து திரும்பி மீண்டும் பத்திரமாகத் தரையிறங்கியது.
சாலைகளில் சென்று கொண்டிருக்கும்போது குறிப்பிட்ட இடத்தில் போக்குவரத்து நெரிசல் இருப்பது போன்றும், அந்த இடத்தை ரோட்ஸ்டர் கார் பறந்து பாதுகாப்பாக கடக்கும் வகையிலும் செயல் விளக்க வீடியோ அமைக்கப்பட்டிருந்தது.
டெஸ்லாவின் தகவல்படி, இந்த பறக்கும் கார் ஒரு நொடிக்கும் குறைவான நேரத்தில் அதாவது 1.6 விநாடிகளில் மணிக்கு 96 கிலோ மீட்டர் என்ற வேகத்தை எட்டும் எனவும், ஒற்றை இருக்கை ராக்கெட் மாடலின் த்ராட் இதை விட வேகமாக இருக்கும் எனவும் டெஸ்லா கூறியுள்ளது. முழுமையாக சார்ஜ் செய்தால் அதிகபட்சமாக 483 கிலோ மீட்டர் தூரம் வரையும் அதிகபட்சமாக மணிக்கு 370 கிலோ மீட்டர் வேகத்தில் பயணிக்க முடியும் எனவும் அறிவிக்கப்பட்டுள்ளது.
இந்தப் பறக்கும் காரின் உற்பத்தியை 2028ம் ஆண்டு தொடங்க திட்டமிட்டுள்ள நிலையிலும் திட்டமிட்டபடி வாகனங்கள் விநியோகம் செய்யப்படும் என்பதற்கு எந்த உத்தரவாதமும் டெஸ்லா கொடுக்கவில்லை. என்றாலும் இப்போதே ஏராளமான முன்பதிவுகளும் தொடங்கிவிட்டதாக டெஸ்லா தரப்பில் தெரிவிக்கப்பட்டுள்ளது.
இந்த Tesla Roadster பறக்கும் காரின் செயல்விளக்க வீடியோ பார்வையாளர்களை மெய்சிலிர்க்க வைத்தாலும் டெஸ்லா ரோட்ஸ்டர் எவ்வளவு உயரமாக, எவ்வளவு தூரம் மற்றும் எவ்வளவு நேரம் பறந்தது? பறக்கும் உயரம், கிடைமட்ட தூரம் அல்லது காற்றில் செலவழித்த நேரம் ஆகியவற்றிற்கான சரிபார்க்கப்பட்ட புள்ளிவிவரங்களை டெஸ்லா வெளியிடவில்லை.
சாய்வுதள சூழ்ச்சியின் போது தரையிலிருந்து சுமார் 21 மீட்டர் உயரத்தில் இருந்ததாகக் குறிப்பிடப் பட்டாலும் இந்த பறக்கும் காரால் கணிசமான தடைகளைத் தாண்ட முடியுமா, நீண்ட காலத்திற்கு காற்றில் நிலைத்திருக்க முடியுமா தரையைத் தொடாமல் குறிப்பிடத்தக்க தூரம் பயணிக்க முடியுமா என்பதை டெஸ்லாவின் செயல்விளக்க வீடியோ உறுதிப்படுத்தவில்லை.
இந்த பறக்கும் கார், சாதாரண சாலைப் பயன்பாட்டிற்கு அங்கீகரிக்கப்பட்டால், அதன் உரிமையாளர்கள் வழக்கமான வாகன உரிமக் கட்டமைப்பின் கீழ் அதை ஓட்ட முடியும் என்றாலும் காரை விமானமாக இயக்கும்போது, அந்தந்த அதிகார வரம்பு மற்றும் விமானப் பயணத்தின் தன்மையைப் பொறுத்து, கூடுதல் விமானப் போக்குவரத்து விதிமுறைகள் பொருந்தக்கூடும்.
மேலும் சாதாரண வாகனக் காப்பீடு, வான்வழிச் செயல்பாடுகளால் ஏற்படும் சேதங்களையோ அல்லது காயங்களையோ ஈடுசெய்யாது. எனவே, காப்பீட்டு நிறுவனங்கள் அபாயங்களை மதிப்பீடு செய்து, எந்த வகையான காப்பீட்டுத் திட்டம் பொருத்தமானது என்பதைத் தீர்மானிக்க வேண்டியிருக்கும்.
இந்தியாவில் Tesla Roadster யை வாங்குபவர்களுக்கு, இந்திய வாகனச் சட்டம், விமானப் போக்குவரத்து மற்றும் பாதுகாப்பு விதிமுறைகளே பொருந்தும். மாறாக அமெரிக்காவில் அமலில் உள்ள விதிகள், இந்தியாவில் தானாகவே நடைமுறைக்கு வராது.
அதாவது ஒரு ரோட்ஸ்டரை வாங்குவது என்பது, அதன் உரிமையாளருக்குத் தான் விரும்பும் இடமெல்லாம் அதன் த்ரஸ்டர்களை (thrusters) இயக்கும் உரிமையை வழங்கிவிடாது என்பது தான் உண்மை .
2017-ல் ஆரம்ப விலை 200,000 டாலர் என்ற குறிப்பிட்டிருந்த டெஸ்லா அந்தத் தொகையை தற்போதைய புதிய மாடலின் உறுதியான விலையாகக் கூறவில்லை. மேலும் டெஸ்லாவின் முன்பதிவுப் பட்டியல்களின்படி, Performance மாடலுக்கு 50,000 டாலரும், Thrust மாடலுக்கு 250,000 டாலரும் வைப்புத்தொகையாக நிர்ணயிக்கப்பட்டுள்ளதாகத் தகவல்கள் தெரிவிக்கின்றன. ஒரே ஒரு நபர் மட்டும் அமரும் வகையில் வடிவமைக்கப்பட்டுள்ள Rocket மாடலின் இறுதி விலை இன்னும் உறுதி செய்யப்படவில்லை.
மேலும், இது பொதுச் சாலைகளில் பயன்படுத்துவதற்கு இன்னும் அங்கீகாரம் பெறவில்லை என்று டெஸ்லா இணையதளத்தில் குறிப்பிடப்பட்டுள்ளது.
எல்லாவற்றிக்கும் மேலாக தரையிலிருந்து மேலே எழக்கூடிய Tesla Roadster பறக்கும் கார் வான்வெளி, அனுமதிக்கப்பட்ட புறப்பாடு மற்றும் தரையிறங்கும் பகுதிகள், வாகனச் சான்றிதழ் மற்றும் விபத்து ஏற்பட்டால் ஏற்படும் பொறுப்பு ஆகியவை குறித்த கேள்விகளை எழுப்பியுள்ளது.
வான்வழி சாகசத்தைச் செய்யக்கூடிய ஒரு கார், தானாகவே வழக்கமான போக்குவரத்திற்கு மாற்றாக அமையக்கூடிய ஒரு பறக்கும் காராக மாறிவிடாது என்று கூறப்படுகிறது.
