மக்களவையில் மத்திய அரசு மீது காங்கிரஸ், பிஆர்எஸ் கட்சிகள் நம்பிக்கையில்லா தீர்மானம் கொண்டுவர நோட்டீஸ் அளித்திருந்த நிலையில் நிலையில், விவாதத்துக்கு ஏற்றுக் கொள்ளப்பட்டது. இதுதொடர்பாக மக்களவை சபாநாயகர் ஓம்பிரகாஷ், “நம்பிக்கையில்லா தீர்மானம் விவாதத்துக்கு ஏற்கப்பட்டது. அனைத்துக் கட்சிகளுடனும் ஆலோசித்து விவாதத்துக்கான நேரம் குறிக்கப்படும்” என்று தெரிவித்துள்ளார்.
மணிப்பூர் விவகாரம் தொடர்பாக, பிரதமர் நரேந்திர மோடி பதில் அளிக்கக் கோரி, எதிர்க்கட்சி உறுப்பினர்கள் தொடர்ந்து, கடும் அமளியில் ஈடுபட்டு வந்தனர்.
நாடாளுமன்ற மழைக்கால கூட்டத்தொடர் 5-வது நாளாக இன்றும் முடங்கியது.
இந்நிலையில் இன்று காலை மக்களவை கூடியவுடன் எதிர்க்கட்சிகள் அமளியில் ஈடுபட்டதால் அவை 12 மணிக்கு ஒத்திவைக்கப்பட்டது.
அவை மீண்டும் கூடியபோது, நம்பிக்கையில்லா தீர்மானம் ஏற்றுக்கொள்ளப்பட்டதாகத் தெரிவித்தார். அதன் மீதான விவாதம் நேரம் குறித்து திட்டமிட்டு அறிவிக்கப்படும் என்றார். மணிப்பூர் பற்றிய விவாதங்கள் தொடங்கிய நிலையில் அவையில் பிரதமர் இருப்பது அவசியம் எனக் கூறி எதிர்க்கட்சிகள் மீண்டும் அமளியில் ஈடுபட மக்களவை பிற்பகல் 2 மணி வரை ஒத்திவைக்கப்பட்டது. மீண்டும் கூடிய மக்களவை எதிர்க்கட்சிகளின் தொடர் அமளியால் நாளை காலை 11 மணிவரை ஒத்துவைக்கப்பட்டுள்ளது.
நாடாளுமன்ற மழைக்கால கூட்டத்தொடர் கடந்த 20ஆம் தேதி தொடங்கிய நிலையில், இதுவரை ஒருநாள்கூட இரு அவைகளும் முழுவீச்சில் செயல்படாத நிலையில் கூட்டத்தொடர் முடிய இன்னும் 13 நாட்கள் மட்டுமே உள்ளது என்பது குறிப்பிடத்தக்கது.
