அமெரிக்காவில் வானில் பறந்து கொண்டிருந்த விமானம் திடீரென 3 நிமிடங்களில் சுமார் 15,000 அடி கீழை இறங்கியதால், பயணிகள் அதிர்ச்சியடைந்தனர்.
அமெரிக்க நாட்டின் விமான நிறுவனம் இயக்கி வரும் விமானம் ஒன்று வட கரோலினாவின் சார்லோட் பகுதியில் இருந்து புளோரிடாவின் கெய்னெஸ்வில்லிக்கு கடந்த 10-ம் தேதி பயணித்தது. அப்போது, அந்த விமானம் நடுவானில் பறந்து கொண்டிருந்தபோது திடீரென வெறும் மூன்றே நிமிடங்களில் சுமார் 15,000 அடி கீழே இறங்யது. இதனால் அதிர்ச்சியடைந்த பயணிகள் ஆக்ஸிஜன் முகக்கவசத்தை அணிந்துள்ளனர்.
இது குறித்து அந்த விமானத்தில் பயணித்த நபர் ஒருவர் தனது அனுபவத்தை எக்ஸ் பக்கத்தில் பகிர்ந்துள்ளார். “நான் விமானத்தில் அதிகம் பயணித்துள்ளேன். ஆனால், இது திகிலூட்டும் வகையில் அமைந்திருந்தது. தக்க நேரத்தில் திறம்பட செயல்பட்ட அமெரிக்கன் ஏர் 5916 விமானத்தின் விமானி மற்றும் விமான குழுவினருக்கு பாராட்டுகளை தெரிவித்துக் கொள்கிறேன். ஏதோ ஒருவித கோளாறு காரணமாக இது நடந்துள்ளது”என்று தெரிவித்துள்ளார். அதேசமயம், அந்த விமானம் திட்டமிட்டபடி கெய்னெஸ்வில்லியில் அன்றைய தினம் பத்திரமாக தரையிறங்கபட்டது.
இது பீட்மாண்ட் ஏர்லைன்ஸ் நிறுவனத்தால் இயக்கப்படும் அமெரிக்கன் ஈகிள் விமானம் 5916 ஆகும். விமானம் நடுவானில் பறந்து கொண்டிருந்த போது அழுத்தம் குறைந்ததற்கான அறிகுறியை அறிந்தனர். அதனால் பாதுகாப்பான உயரத்துக்கு இறங்க வேண்டி இருந்தது. பயணிகளுக்கு ஏற்பட்ட சிரமத்துக்கு வருந்துகிறோம் என அந்த விமான நிறுவனத்தின் செய்தித் தொடர்பாளர் தெரிவித்துள்ளார்.
