காவிரி ஆற்றில் நீர்வரத்து குறைந்ததால் ஒகேனக்கல்லுக்கு நீர்வரத்து 8,000 கன அடியாகக் குறைந்துள்ளது.
கர்நாடக மாநில நீர்பிடிப்புப் பகுதிகளில் பெய்து வந்த மழையால் கபினி மற்றும் கிருஷ்ணராஜ சாகர் அணைகளுக்கு நீர்வரத்து அதிகரித்துள்ளது. இந்த இரு அணைகளில் இருந்தும் கடந்த சில நாட்களுக்கு முன்பு தமிழக, கர்நாடக எல்லையான பிலிகுண்டுலு வழியாக ஒகேனக்கல்லுக்கு வினாடிக்கு 17 ஆயிரத்து 960 கன அடி வீதம் தண்ணீர் திறந்து விடப்பட்டது. நேற்று கர்நாடக அணையில் இருந்து திறந்து விடப்படும் நீரின் அளவு காலை 6 மணி நிலவரப்படி 8,500 கன அடியாகக் குறைந்து வந்தது.
இந்நிலையில் கர்நாடக மாநிலம் கபினி மற்றும் கிருஷ்ணராஜ சாகர் அணைகளில் இருந்து திறந்து விடப்படும் தண்ணீரின் அளவு மேலும் குறைக்கப்பட்டது. இந்த நீர்வரத்து படிப்படியாக குறைந்து 8 ஆயிரம் கனஅடியாக குறைந்தது. நீர்வரத்து அதிகரிப்பதும், குறைவதுமாக உள்ளதால் தமிழக கர்நாடக மாநில எல்லையான பிலிகுண்டுலுவில் மத்திய நீர்வள ஆணைய அதிகாரிகள் தொடர்ந்து கண்காணித்து வருகின்றனர்.
சுற்றுலாப் பயணிகளின் பாதுகாப்பு கருதி காவிரி ஆற்றில் பரிசல் இயக்க மாவட்ட நிர்வாகம் விதிக்கப்பட்ட தடையானது தொடர்ந்து அமலில் உள்ளது. இதனால் ஒகேனக்கல்லுக்கு வரும் சுற்றுலா பயணிகள் ஏமாற்றத்துடன் செல்கின்றனர்.
