சம்பளம் உயர்வு உள்ளிட்ட காரணங்களை வலியுறுத்தி தூய்மை பணியாளர்கள் தர்ணா போராட்டத்தில் ஈடுபட்டனர்.
நாமக்கல் அரசு மருத்துவக் கல்லூரி மருத்துவமனையில் ஒப்பந்தம் அடிப்படையில் சுமார் 150 தூய்மை பணியாளர்கள் பணியாற்றி வருகின்றனர். இவர்கள் நோயாளிகளை அழைத்து செல்வது, மருந்து மாத்திரைகளை வாங்கி கொடுப்பது, தூய்மை பணி மற்றும் பாதுகாப்பு பணிகளைச் செய்கின்றனர். இவர்களுக்கு தனியார் நிறுவனம் மூலம் மாத சம்பளம் வழங்கப்படுகிறது. இந்நிலையில் ஊதிய உயர்வு உள்ளிட்ட கோரிக்கைகளை வலியுறுத்தி 50-க்கும் மேற்பட்ட தூய்மை பணியாளர்கள் பணியைப் புறக்கணித்து மருத்துவமனை வளாகத்தில் தர்ணா போராட்டத்தில் ஈடுபட்டனர்.
ஒப்பந்தங்கள் நிறுவனங்கள் நாள் ஒன்றுக்குக் குறைந்தபட்ச ஊதியமாக சுமார் 720 ரூபாய் வழங்க வேண்டும். ஆனால், அவர்கள் தங்களுக்கு ரூபாய் 400 மட்டுமே வழங்கி வருவதாகவும், விடுமுறை எடுத்தால் அதிக அளவில் பணம் பிடித்தம் செய்வதாகவும் தூய்மை பணியாளர்கள் புகார் தெரிவித்துள்ளனர்.
எனவே அரசால் நிர்ணயம் செய்யப்பட்ட ஊதியம் வழங்க நடவடிக்கை எடுக்க வேண்டும், வருங்கால வைப்பு நிதிக்காகப் பிடிக்கப்படும் தொகையை மாதந்தோறும் முறையாக எங்களது கணக்கில் வரவு வைக்க வேண்டும், அடிப்படை வசதிகளைச் செய்து தர வேண்டும், வார விடுமுறை எடுக்க அனுமதிக்க வேண்டும் உள்ளிட்ட பல்வேறு கோரிக்கைகளை வலியுறுத்திக் கண்டன கோஷங்களை எழுப்பினர். காலையில் தொடங்கிய தர்ணா போராட்டம் மாலை வரை நீடித்தது.
