இராமேஸ்வரத்தில் கடல் திடீரென 200 மீட்டர் அளவுக்கு உள்வாங்கியதால் மீனவர்கள் அச்சமடைந்தனர்.
இராமேஸ்வரம் மீன்பிடி துறைமுகத்தில் இருந்து 500-க்கும் மேற்பட்ட விசைப்படகுகளில் ஆயிரக்கணக்கான மீனவர்கள் மீன்பிடி தொழிலில் ஈடுபட்டு வருகின்றனர்.
இந்நிலையில், இராமேஸ்வரம் மீன்பிடி துறைமுகப் பகுதியில், திடீரென 200 மீட்டர் அளவுக்குக் கடல் உள்வாங்கியது. இதனால் மீனவர்கள் நங்கூரமிட்டு நிறுத்தி வைத்திருந்த விசைப்படகுகள் மற்றும் நாட்டுப்படகுகள் தரை தட்டி நின்றன.
இந்த நிகழ்வு, அப்பகுதி மக்கள் மற்றும் மீனவர்கள் மத்தியில் பரபரப்பை ஏற்படுத்தியுள்ளது. இதற்கிடையில், சுற்றலா பயணிகள் கடல் உள்வாங்கியதை ஆச்சரியத்துடன் பார்த்துச் செல்கின்றனர்.
இதுபோன்ற நிகழ்வுகள் அடிக்கடி ஏற்படுவதாக மீனவர்கள் தெரிவித்தனர். இந்தப் பகுதியில் கடல் உள்வாங்குவது, கடல் சீற்றம் ஏற்படுவது உள்ளிட்டவை அடிக்கடி நிகழ்வது குறித்து ஆய்வு செய்ய மீனவர்கள் கோரிக்கை வைத்தனர்.
