சுரங்கப் பாதை பணியின் காரணமாக, சென்னை சென்ட்ரலில் இருந்து திருப்பதிக்கும், திருப்பதியிலிருந்து சென்னை சென்ட்ரலுக்கும் இயக்கப்படும் 14 விரைவு இரயில்களின் சேவை தற்காலிகமாக ரத்து செய்யப்பட்டுள்ளது.
இதுகுறித்து தெற்கு இரயில்வே நிர்வாகம் வெளியிட்டுள்ள செய்திக் குறிப்பில், “ஜோலார்பேட்டை- கே.எஸ்.ஆர். பெங்களூரு இடையே தற்காலிக கிர்டர் பொருத்தும் பணி, ஜோலார்பேட்டை- சோமநாயக்கன் பட்டிக்கு இடையே சுரங்க வழித்தடக் கட்டுமானப் பணிகள் நடைபெற்று வருகின்றன. இதன் காரணமாக, 14 எக்ஸ்பிரஸ் இரயில்கள் தற்காலிகமாக ரத்து செய்யப்பட உள்ளன” என்று தெரிவித்துள்ளது.
அதன்படி, திருப்பதியில் இருந்து காலை 6.25 மணிக்கு இயக்கப்பட்டு வரும் திருப்பதி-எம்.ஜி.ஆர். சென்னை சென்ட்ரல் எக்ஸ்பிரஸ் இரயில் செப்டம்பர் 12, 13, 14, 15, 21, 22, 24, 25 ஆகிய தேதிகளில் முழுவதுமாக ரத்து செய்யப்படுகிறது. அதேபோல, சென்னை சென்ட்ரல்- திருப்பதிக்கு வருகிற 12, 13, 14, 15, 20, 21, 23, 25 ஆகிய தேதிகளில் மாலை 4.35 மணிக்கு இயக்கப்படும் இரயில், திருப்பதி- சென்னை சென்ட்ரலுக்கு 12, 13,14, 15, 21, 22, 24, 25 ஆகிய தேதிகளில் இயக்கப்படும் எக்ஸ்பிரஸ் இரயில், சென்னை சென்ட்ரல்- மைசூருக்கு 12, 13, 14, 20, 21, 23, 24 ஆகிய தேதிகளில் இரவு 9.15 மணிக்கு இயக்கப்படும் காவிரி எக்ஸ்பிரஸ் இரயில், மைசூரு- சென்னை சென்ட்ரலுக்கு 13, 14, 15, 21, 22, 24 25 ஆகிய தேதிகளில் இரவு 9 மணிக்கு இயக்கப்படும் எக்ஸ்பிரஸ் இரயில் என மொத்தம் 14 இரயில்கள் ரத்து செய்யப்பட உள்ளன.
மேலும், 6 இரயில்கள் மாற்றுப்பாதையில் இயக்கப்பட உள்ளன. சென்னை சென்ட்ரல்- கே.எஸ்.ஆர். பெங்களூருவுக்கு 12-ம் தேதி இரவு 10.50 மணிக்குப் புறப்பட வேண்டிய எக்ஸ்பிரஸ் இரயில் (12657) 1.30 மணி நேரம் தாமதமாகப் புறப்பட்டுச் செல்லும். இது தவிர 6 இரயில்கள் குறிப்பிட்ட நாட்களில் நேரம் மாற்றி இயக்கப்பட உள்ளதாக இரயில்வே நிர்வாகம் தெரிவித்துள்ளது.
