திமுக அமைச்சர் கே.என். நேருவுக்கு மிகவும் நெருக்கமானவர் என கூறப்படும், கோவையில் உள்ள பிரபல கட்டுமான நிறுவன உரிமையாளர்கள் வீடு மற்றும் அலுவலகங்களில் வருமானவரித்துறை அதிகாரிகள் சோதனை நடத்தி வருகின்றனர்.
கோவை மருதமலை சாலையில் நவாவூர் பிரிவு பகுதியில் ஸ்ரீதக்ஷா பிராப்பர்டீ அண்ட் டெவலப்பர்ஸ் என்ற நிறுவனம் செயல்பட்டு வருகிறது.
ஸ்ரீதக்ஷா பிராப்பர்டீ அண்ட் டெவலப்பர்ஸ் தலைமை அலுவலகம் மற்றும் வடவள்ளி குருசாமி நகர், அருள்நகர், பாலாஜி நகர்ப் பகுதியில் உள்ள நிறுவனத்தின் இயக்குநர்கள் மோகன், ராமநாரயணன், மற்றும் அருள் ஆன்டனி ஆகியோரது வீடுகளில் இன்று வருமானவரித்துறையினர் திடீர் சோதனையில் ஈடுபட்டு வருகின்றனர்.
ஸ்ரீதக்ஷா நிறுவனம் கோவை உட்படத் தமிழகத்தின் பல்வேறு நகரங்களில் வீட்டு மனைகளை வாங்கி அடுக்குமாடிக் குடியிருப்புகளைக் கட்டி விற்பனை செய்து வருகிறது.
இந்த நிறுவனம் வரி ஏய்ப்பு செய்ததாக எழுந்த புகாரின் பேரில், இந்த சோதனை நடைபெற்று வருவதாகத் தகவல் வெளியாகியுள்ளது.
வருமானவரித்துறை சோதனையையொட்டி, மோகன், ராமநாரயணன், மற்றும் அருள் ஆண்டனி வீட்டில் பாதுகாப்பிற்காகத் துப்பாக்கி ஏந்திய காவல்துறையினர் நிறுத்தப்பட்டுள்ளனர்.
இதில், இந்த நிறுவனத்தின் இயக்குநர்களில் ஒருவரான மோகன், திமுக அமைச்சர் கே.என். நேருவுக்கு மிகவும் நெருக்கமான நண்பர் என்று தகவல் வெளியாகியுள்ளது.
இதனால், கோவையில் பெரும் பரபரப்பு ஏற்பட்டுள்ளது.
வருமானவரித்துறை ரெய்டு குறித்து. இந்த நிறுவனம் சார்பில், இதுவரை விளக்கம் ஏதும் வெளியாகவில்லை.
