சூரியனை ஆய்வு செய்வதற்காக அனுப்பப்பட்ட ஆதித்யா எல் 1 விண்கலம், அறிவியல் தரவுகளைச் சேகரிக்கத் தொடங்கி இருப்பதாக இந்திய விண்வெளி ஆராய்ச்சி மையமான இஸ்ரோ தெரிவித்திருக்கிறது.
நிலவின் தென் துருவத்தை ஆய்வு செய்வதற்காக, சந்திரயான்-3 விண்கலத்தை இந்திய விண்வெளி ஆராய்ச்சி மையம் (இஸ்ரோ) கடந்த ஜூலை மாதம் 14-ம் தேதி விண்ணில் செலுத்தியது. இது கடந்த ஆகஸ்ட் மாதம் 23-ம் தேதி மாலை 6.04 மணிக்கு திட்டமிட்டபடி வெற்றிகரமாகத் தரையிறக்கப்பட்டது.
விக்ரம் லேண்டர் நிலவில் தரையிறங்கியதும், அதிலிருந்து வெளியே வந்த பிரக்யான் ரோவர், இரு வாரங்கள் ஆய்வில் ஈடுபட்டு தகவல்களை இஸ்ரோவுக்கு அனுப்பி வந்தது. தற்போது உறக்க நிலையில் உள்ள ரோவர், செப்டம்பர் 22-ம் தேதி நிலவில் சூரியன் உதித்த பிறகு மீண்டும் செயல்படும் என்று கூறப்படுகிறது.
இதனிடையே, சூரியனை ஆய்வு செய்வதற்காக செப்டம்பர் 2-ம் தேதி ஆதித்யா எல்-1 விண்கலத்தை இஸ்ரோ விண்ணில் செலுத்தியது. புவி சுற்றுவட்டப் பாதையில் பயணம் மேற்கொண்டு வரும் ஆதித்யா எல்-1 விண்கலம், நாளை (செப்டம்பர் 19-ம் தேதி) புவி சுற்றுவட்டப் பாதையிலிருந்து வெளியேறி சூரியனை நோக்கி பயணம் செய்யவுள்ளது. பூமியிலிருந்து சுமார் 15 லட்சம் கிலோ மீட்டர் தூரம் சென்று, சூரியனை ஆய்வு செய்து தகவல்களை அனுப்பும்.
இந்த நிலையில், 50,000 கிலோமீட்டர் தூரத்தில் இருந்தபோது, செப்டம்பர் 10-ம் தேதியே ஆதித்யா எல்-1 விண்கலம், சூப்ரா தெர்மல் அண்ட் எனர்ஜிடிக் பார்ட்டிகல் ஸ்பெக்ட்ரோமீட்டர் (STEPS) கருவியைப் பயன்படுத்தி அறிவியல் தரவை சேகரிக்கத் தொடங்கி விட்டதாக இஸ்ரோ தெரிவித்திருக்கிறது. இது பூமியின் ரேடியசில் இருந்து 8 மடங்கு அதிகமாகும். இந்த ஸ்டெப்ஸ் கருவியில் 6 சென்சார்கள் உள்ளன. இவற்றைக் கொண்டு வெவ்வேறு திசைகளிலும் ஆய்வுகள் நடைபெறுகிறது.
ஸ்டெப்ஸ் கருவி அதிவெப்ப மற்றும் ஆற்றல் மிக்க அயனிகள் மற்றும் எலெக்ட்ரான்களை ஆய்வு செய்யும் என்று தெரிவிக்கப்பட்டுள்ளது. புவி வட்டப்பாதையில் சேகரித்த தரவு, பூமியின் துகள்கள், காந்தப் புலன் பற்றிப் பகுப்பாய்வு செய்வதாகவும் இஸ்ரோ தெரிவித்திருக்கிறது. அகமதாபாத்தில் அமைந்துள்ள விண்வெளி பயன்பாட்டு மையத்துடன் (SAC) இணைந்து இயற்பியல் ஆராய்ச்சி ஆய்வகத்தால் (PRL) வடிவமைக்கப்பட்டது என்பது குறிப்பிடத்தக்கது.
Aditya-L1 Mission:
Aditya-L1 has commenced collecting scientific data.The sensors of the STEPS instrument have begun measuring supra-thermal and energetic ions and electrons at distances greater than 50,000 km from Earth.
This data helps scientists analyze the behaviour of… pic.twitter.com/kkLXFoy3Ri
— ISRO (@isro) September 18, 2023
