பிரபல பதிப்பாளரும், எழுத்தாளருமான பத்ரி சேஷாத்திரி மீது பெரம்பலூர் மாவட்டம் குன்னம் காவல்துறை பதிவு செய்த முதல் தகவல் அறிக்கையை, சென்னை உயர் நீதிமன்றம் அதிரடியாக ரத்து செய்து உத்தரவிட்டுள்ளது.
உச்ச நீதிமன்ற தலைமை நீதிபதி சந்திரசூட் தொடர்பாக யூடியூப் சேனல் ஒன்றில் அவதூறாகப் பேசியதாக வழக்கறிஞர் ஒருவர், பிரபல பதிப்பாளரும், எழுத்தாளருமான பத்ரி சேஷாத்ரி மீது பெரம்பலூர் மாவட்டம் குன்னம் காவல்துறையில் புகார் கொடுத்தார்.
இந்தப் புகாரை ஏற்றுக் கொண்ட காவல் துறையினர் கடந்த ஜூலை 29 -ம் தேதி அதிகாலையில்பத்ரி சேஷாத்ரியை கைது செய்தனர்.
கலவரத்தை ஏற்படுத்தும் நோக்கில் தூண்டுவது, மதம், இனம், பிறந்த இடம், வசிப்பிடம், மொழி போன்றவற்றின் அடிப்படையில் வெவ்வேறு குழுக்களிடையே பகையை ஏற்படுத்துவது மற்றும் நல்லிணக்கத்தைப் பேணுவதற்கு பாதகமான செயல்களைச் செய்வது, பொதுமக்களுக்கு இடையூறு விளைவிக்கும் அறிக்கைகள் வெளியிட்டது என 3 பிரிவுகளில்,
பத்ரி சேஷாத்ரி மீது முதல் தகவல் அறிக்கை பதிவு செய்யப்பட்டது.
பத்ரி சேஷாத்ரி கைதுக்கு, தமிழக பாஜக தலைவர் அண்ணாமலை கடும் கண்டனம் தெரிவித்திருந்தார்.
இதனிடையே, பத்ரி சேஷாத்ரி-க்கு குன்னம் நீதிமன்றம் ஜாமீன் வழங்கி உத்தரவிட்டது. இந்த நிலையில், இந்த வழக்கில், பத்ரி சேஷாத்ரி மீது, காவல்துறை பதிவு செய்த முதல் தகவல் அறிக்கையை ரத்து செய்து சென்னை உயர் நீதிமன்றம் உத்தரவிட்டுள்ளது.
