கிரிக்கெட் அணியில் இடம்பிடிக்க அதிகமான போட்டி உள்ளதால், பலரது கனவு கனவாகவே உள்ளது. அப்படி இருக்கையில் சென்னையைச் சேர்ந்த உணவு டெலிவரி செய்யும் லோகேஷ் குமார் உலகக் கோப்பையில் விளையாடும் நெதர்லாந்து அணிக்குத் தேர்வாகியுள்ளார்.
இந்தியா தலைமையேற்று நடத்தும் உலகக் கோப்பை கிரிக்கெட் அடுத்த மாதம் 5-ந் தேதி தொடங்கி நவம்பர் 19-ந் தேதி வரை நடைபெறவுள்ளது. இந்தத் தொடரில், இந்தியா, ஆஸ்திரேலியா, இங்கிலாந்து, நெதர்லாந்து, நியூசிலாந்து, இலங்கை, பாகிஸ்தான், ஆப்கானிஸ்தான், தென் ஆப்ரிக்கா, வங்கதேசம் உள்ளிட்ட நாடுகளைச் சேர்ந்த அணிகள் பங்கேற்கின்றன.
பொதுவாக இந்திய மைதானங்கள் சுழற்பந்து வீச்சுக்கு ஒத்துழைக்கும் என்பதால், நெதர்லாந்து கிரிக்கெட் வாரியம், எங்கள் அணிக்கு நெட் பவுலராக இந்திய பந்துவீச்சாளர்கள் தேவை என விளம்பரம் செய்தது. இதற்காக சுமார் இந்திய வீரர்கள் 10 ஆயிரம் பேர் விண்ணப்பித்த நிலையில், 4 பேரை மட்டுமே நெதர்லாந்து கிரிக்கெட் வாரியம் தேர்வு செய்துள்ளது.
அதில், சென்னையில் உணவு டெலிவரி செய்யும் லோகேஷ் குமாரும் ஒருவர். கிரிக்கெட்டில் சாதிக்க வேண்டும் என்ற கனவுடன் இருந்த இவர், உணவு டெலிவரி நேரங்கள் போக கிடைக்கும் நேரங்களில் எல்லாம் கிரிக்கெட் விளையாடி வந்தார்.
இதற்கிடையே, 4 ஆண்டுகள் தமிழ்நாடு கிரிக்கெட் சங்கத்தின் ஐந்தாவது டிவிஷனுக்கு விளையாடியுள்ள லோகேஷ், 4வது டிவிஷனுக்கு விளையாட பதிவு செய்திருக்கிறார். அந்த நேரத்தில் நெதர்லாந்து கிரிக்கெட் வாரியத்தின் விளம்பரத்தைப் பார்த்து விண்ணப்பித்த அவருக்கு நெதர்லாந்து அணி வாய்ப்பளித்துள்ளது.
ஏற்கனவே, இந்தியா வந்துள்ள நெதர்லாந்து அணி, பெங்களூருவில் உள்ள ஆலூரில் பயிற்சியில் ஈடுபட்டு வருகிறது. தேர்வான 4 பேரும் நெதர்லாந்து அணியுடன் இணைந்து பயிற்சிக்காக பந்து வீசி வருகின்றனர்.
