வளர்ச்சி சார்ந்த சவால்களை எதிர்கொள்வதில் இந்தியா ஒத்துழைப்பு வழங்கும் என்று அமெரிக்காவில் நடந்த நிகழ்ச்சியில் மத்திய வெளியுறவுத்துறை அமைச்சர் ஜெய்சங்கர் கூறியுள்ளார்.
இந்திய வெளியுறவுத்துறை அமைச்சர் ஜெய்சங்கர் தலைமையிலான குழு ஐ.நா. பொதுச்சபையின் உயர்மட்ட கூட்டத்தில் கலந்து கொள்வதற்காக அமெரிக்கா சென்றுள்ளது. இந்நிலையில், அமெரிக்காவில் இந்திய வெளியுறவுத்துறை அமைச்சர் ஜெய்சங்கர், தெற்குலக நாடுகளுக்கு இந்தியாவின் தொடா் ஆதரவைத் தெரிவிக்கும் வகையில், ‘தெற்குலக நாடுகளின் வளர்ச்சியில் இந்தியா – ஐ.நா.’ என்ற தலைப்பிலான கருத்தரங்க நிகழ்ச்சியில் கலந்து கொண்டார்.
இதில் அவர் பேசியதாவது, “இந்த ஆண்டு இறுதி வரை நாங்கள் தான் ஜி20-க்கு தலைமையாக இருப்போம். ஜி20 பதவிக்காலம் இருக்கும் போதும், முடிந்த பிறகும், நாங்கள் பங்களிப்பாளராகவும், சிறந்த கூட்டாளியாகவும், கூட்டணி அமைப்பவராகவும் செயல்படுவோம்.
இதன் மூலம் மற்றவர்களையும் வளர்ச்சிக்கான சவால்களை எதிர்கொள்ளச் செய்வதில், நாங்கள் உதாரணமாக இருப்போம். எங்களது அனுபவங்கள் மற்றும் சாதனைகளை நல்ல விதத்தில் ஊக்கமளிக்கும் வகையில், உங்களுடன் பகிர்ந்து கொள்வோம் என்று தெரிவித்தார்.
மேலும், இவை பல விதங்களில் உங்களுக்குப் பயனுள்ளதாக இருக்கும் என்பது எங்களுக்குத் தெரியும். ஒத்துழைப்பு விவகாரத்தில், நாங்கள் எப்போதும் பேச்சுவார்த்தைக்குத் தயாராகவே இருந்து இருக்கிறோம். இந்த விவகாரத்தில் ஆப்பிரிக்க யூனியனை ஜி20-இல் இணைத்ததை நாங்கள் மேற்கோள்காட்டுகிறோம் என்றார். மேலும், இது தொடர்பான ஒத்துழைப்பு ஜி20-இல் மட்டுமின்றி அதை கடந்தும் தொடரும் என்றே நம்புகிறேன்,” என்று அவர் தெரிவித்தார்.
மத்திய அமைச்சர் ஜெய்சங்கர் வரும் 26-ந் தேதி 78-வது ஐக்கிய நாடுகள் பொதுச்சபையின் உயர்மட்ட அமர்வில் உரையாற்ற உள்ளார். மேலும், வாஷிங்டனில் செப்டம்பர் 27-ந் தேதி முதல் 30-ந் தேதி வரை அமெரிக்காவின் வெளியுறவுத்துறை அமைச்சர் ஆண்டனி பிளிங்கன், வெளியுறவுத்துறைச் செயலர், அமெரிக்க நிர்வாகத்தின் மூத்த உறுப்பினர்கள், அமெரிக்க வணிகத் தலைவர்கள் மற்றும் சிந்தனையாளர்களுடன் இந்திய அமைச்சர் ஜெய்சங்கர் கலந்துரையாடல் நடத்த உள்ளார்.
பின்னர், வாழும் கலை (Art of Living) அமைப்பு நடத்தும் 4-வது உலக கலாச்சார விழாவில் ஜெய்சங்கர் உரையாற்றுகிறார்.
