சீனாவின் ஹாங்ஷோவில் 19ஆவது ஆசிய விளையாட்டுப் போட்டி விறுவிறுப்பாக நடந்து வருகிறது. இதில், 45 நாடுகளைச் சேர்ந்த 12,000க்கும் அதிகமான வீரர், வீராங்கனைகள் பங்கேற்றுள்ளனர். இதுவரையில் இந்தியா துப்பாக்கி சுடுதல், மகளிர் கிரிக்கெட், குதிரையேற்றம் போட்டிகளில் தங்கம் வென்றுள்ளது.
இந்நிலையில் இன்று ஆண்களுக்கான 50 மீ ரைபிள் 3 பி போட்டி நடைபெற்றது. இதில் இந்திய அணி சார்பாக ஸ்வப்னில் குசல், ஐஸ்வரி பிரதாப் சிங் தோமர் மற்றும் அகில் ஷியோரன் ஆகியோர் பங்குபெற்றனர்.
மூவரும் இணைந்து 1769 புள்ளிகளை பெற்று முதலிடம் பிடித்து தங்கம் வென்றனர். தங்கம் வென்றது மட்டும் இல்லாமல் அமெரிக்காவின் முந்தைய உலக சாதனையை முறியடித்து புதிய உலக சாதனை படைத்துள்ளனர்.
மேலும் சீனா மொத்தம் 1763 புள்ளிகள் பெற்று இரண்டாம் இடம் பிடித்து வெள்ளி வென்றது, கொரியா மொத்தம் 1748 புள்ளிகள் பெற்று வெண்கலம் வென்றது.
இதன் மூலம் தற்போதுவரை ஹாங்சோவில் நடந்த துப்பாக்கிச் சுடுதல் போட்டியில் இந்தியாவின் பதக்க எண்ணிக்கை 17 ஆக உயர்ந்துள்ளது.
