கோவையில், பல்வேறு நிகழ்ச்சிகளில் கலந்து கொண்ட, மத்திய அமைச்சர் நிர்மலா சீதாராமன் பள்ளி மாணவர்களுக்கு சந்திரயான் மினியேச்சர் வழங்கினார். இதனால், பள்ளி மாணவர்கள் உற்சாகம் அடைந்தனர்.
கோவையில் மத்திய நிதி அமைச்சர் நிர்மலா சீதாராமன், இன்று பல்வேறு நிகழ்ச்சிகளில் கலந்து கொள்கிறார். அதன் ஒரு பகுதியாக, தூய்மை பிரச்சார திட்டம், கடனுதவி வழங்கும் விழா, கல்லூரி மாணவிகளுடன் கலந்துரையாடல் போன்ற பல்வேறு நிகழ்ச்சிகளில் அவர் கலந்து கொள்கிறார்.
இந்த நிலையில் பீளமேடு பகுதியில் உள்ள கோபாலசாமி நாயுடு பள்ளிக்குச் சென்ற அவர், அப்பள்ளி மாணவ மாணவியருடன் கலந்துரையாடல் நடத்தினர். பின்னர் பேசிய அவர் சந்திரயான் வெற்றி தமிழகத்தைச் சேர்ந்த பலரும் துணை நின்றதாகவும், அதற்காகத் தாம் பெருமைப்படுவதாகவும் கூறினார்.
மேலும், சந்திரயான் மினியேச்சர் மாதிரியைப் பள்ளி மாணவர்களுக்குக் காண்பித்து அது குறித்து விளக்கியதோடு, பள்ளி மாணவர்களுக்கு அதனைப் பரிசாக அளித்தார். அப்பள்ளியைச் சேர்ந்த ஹரிஸ் என்ற மாணவர் துப்பாக்கி சுடுதல் போட்டியில் கலந்து கொண்டு வெற்றி பெற்றதைத் தொடர்ந்து அம்மாணவருக்கு நற்சான்றிதழ் வழங்கிப் பாராட்டினார்.
முன்னதாக, அப்பகுதியில் தூய்மை பாரத திட்டத்தை முன்னிட்டு வங்கி அதிகாரிகள், தன்னார்வலர்கள் மற்றும் தூய்மைப் பணியாளர்களுடன் இணைந்து தூய்மைப் பணிகளை மேற்கொண்டார்.
இதனைத்தொடர்ந்து, கோவை பீளமேடு பகுதியில் புதிதாகக் கட்டப்பட்டுள்ள எஸ்ஐடிபிஐ (SIDBI) வங்கியின் புதிய கிளையைத் திறந்து வைத்தார்.
இந்த நிகழ்ச்சியில், பாஜக தேசிய மகளிர் அணி தலைவரும், கோவை தெற்கு சட்டமன்ற உறுப்பினருமான வானதி சீனிவாசன் உள்படப் பலர் கலந்து கொண்டனர்.
