சோழர் கால செப்பு நாணயங்கள் பண்ருட்டி அருகே கண்டெடுப்பு !

இராஜராஜன் பெயர் பொறித்த நாணயங்களில் தேவநாகரி எழுத்துகளில், ‘ஸ்ரீராஜராஜ’ என, மூன்று வரிகளில் எழுதப்பட்டுள்ளது.

கடலுார் மாவட்டம், பண்ருட்டி அடுத்த உளுந்தாம்பட்டு தென்பெண்ணை ஆற்றங்கரையில் தொல்லியல் ஆய்வாளர் இமானுவேல், கடலுார் அரசு ஐ.டி.ஐ., மாணவர் பிரதாப் உள்ளிட்டோர் கொண்ட குழுவினர் கள ஆய்வு மேற்கொண்டனர். அப்போது, மூன்று பழங்கால செம்பு நாணயங்களை கண்டெடுத்தனர்.

இந்த மூன்று நாணயங்களில், இரண்டு 950 ஆண்டுகள் பழமை வாய்ந்த இராஜராஜன் பெயர் பொறித்த சோழர் கால நாணயங்கள், மற்றொன்று விஜய நகர கால நாணயம்.

இராஜராஜன் பெயர் பொறித்த நாணயங்களில் தேவநாகரி எழுத்துகளில், ‘ஸ்ரீராஜராஜ’ என, மூன்று வரிகளில் எழுதப்பட்டுள்ளது. இரண்டு சோழர் கால நாணயங்களின் ஒரு பக்கம் கையில் மலரை ஏந்தியவாறு ஒருவர் நிற்க, அவரது இடப்பக்கம் நான்கு வட்டங்கள் உள்ளன.

அவற்றின் மேலே பிறையும், கீழே மலரும் உள்ளன. வலது பக்கம் திரிசூலம், விளக்கு உள்ளது. மறுபக்கம் கையில் சங்கு ஏந்தி ஒருவர் அமர்ந்துள்ளார்.

மூன்றாவது நாணயம் தேவநாகரி எழுத்தில் பொறிக்கப்பட்டுள்ள விஜய நகர பேரரசு நாணயம். நாணயத்தின் முன்பக்கத்தில் தேவநாகரி எழுத்தில் ஸ்ரீநீலகண்டா எனவும், பின்பக்கத்தில் காளை உருவமும், பிறையும் உள்ளது.

தென்பெண்ணை ஆற்றங்கரை பகுதிகளில் சங்ககாலம் முதல் சோழர்காலம் வரை பழங்கால மக்கள் வாழ்ந்ததற்கான தொல்லியல் தடயங்கள் கண்டறியப்பட்டுள்ளன. இந்த பகுதிகள் பழங்கால மக்களின் வாழ்விடமாக இருந்துள்ளது.