இஸ்ரேல் – ஹமாஸ் தீவிரவாதிகள் இடையே கடந்த 6 நாட்களுக்கு மேலாக உச்ச கட்டப்போர் நடந்து வருகிறது. இரு தரப்பும் ராக்கெட் உள்ளிட்ட பயங்கர ஆயுதங்களைக் கொண்டு வருகின்றனர். இதில், இரு நாட்டைச் சேர்ந்த ஆயிரக்கணக்கான மக்கள் உயிரிழந்தனர்.
இந்த நிலையில், இஸ்ரேலில் சிக்கித் தவிக்கும் இந்தியர்களை உடனடியாக மீட்க வேண்டும் எனப் பாரத பிரதமர் மோடி உத்தரவிட்டார். அதன் பேரில், இஸ்ரேலில் உள்ள இந்தியர்களை மீட்கும் வகையில், ஆப்ரேஷன் அஜய் என்ற பெயரில் இந்தியா அதிரடி நடவடிக்கையைத் தொடங்கியது. இதற்காக, இஸ்ரேல் மற்றும் இந்தியாவில் 24 மணி நேரமும் செயல்படும் ஹெல்ப்லைன் துவங்கப்பட்டது.
இந்நிலையில், இஸ்ரேலிலிருந்து தாயகம் திரும்பும் இந்தியர்களுக்கான சிறப்பு விமானம் நேற்று இரவு 9 மணிக்குப் புறப்பட்டது. இதில், 212 இந்தியர்கள் பயணம் செய்தனர். முதலில் வருவோருக்கு முன்னுரிமை என்ற அடிப்படையில், இந்தியா வருபவர்களைத் தேர்வு செய்து அழைத்து வந்தனர். அவர்கள் அனைவரும் தாயகம் திரும்பும் பயணச் செலவை, பாரத அரசே ஏற்றுக் கொண்டது.
இஸ்ரேல் – ஹமாஸ் தீவிரவாதிகள் இடையே போர் தொடங்கிய நிலையில், கடந்த 7-ம் தேதி முதல் ஏர் இந்தியா தனது விமானச் சேவையை நிறுத்திக் கொண்டது. இந்த நிலையில்தான், இஸ்ரேலில் உள்ள இந்தியர்களைக் காப்பாற்ற, பிரதமர் மோடி உத்தரவின் பேரில், சிறப்பு விமானம் இயக்கப்பட்டது. விமானம் மூலம் தாயகம் திரும்பிய 212 பேரும், தேங்க்யூ மோடி எனக் கண்ணீர் மல்கத் தெரிவித்தனர்.
