மதுரையில் கடந்த 11 ஆண்டுகளுக்குப் பின்னர் கிரானைட் குவாரி ஏல அறிவிப்பை மாவட்ட நிர்வாகம் வெளியிட்டுள்ளது.
மதுரை மாவட்டம், மேலூர் பகுதியில் ஏராளமான குவாரிகள் உள்ளன. இந்த குவாரிகளில், விதிகளை மீறி ஒரு தனியார் நிறுவனம் கிரானைட் எடுத்ததில், அரசுக்குப் பலகோடி ரூபாய் இழப்பு ஏற்பட்டதாகப் புகார் எழுந்தது.
இதுதொடர்பாக, அன்றைய மாவட்ட ஆட்சியர் சகாயம் தலைமையிலான குழுவினர் விசாரணை நடத்தி, அறிக்கை தாக்கல் செய்தனர். மேலும் இது தொடர்பாக, 200-க்கும் மேற்பட்ட வழக்குகள் பதிவு செய்யப்பட்டு நீதிமன்றத்தில் விசாரணை நடைபெற்று வருகிறது.
இதையடுத்து, கிரானைட் குவாரிகள் நடத்த 2012-ம் ஆண்டு செப்டம்பர் மாதம் முதல் தடை விதிக்கப்பட்டு இருந்தது. இந்த நிலையில் 11 ஆண்டுகளுக்குப் பிறகு கிரானைட் குவாரிகளை நடத்துவதற்கான ஏல அறிவிப்பை மாவட்ட நிர்வாகம் மீண்டும் வெளியிட்டுள்ளது.
இதில், மேலூர் தாலுகாவுக்கு உட்பட்ட சேக்கிபட்டி, அய்யாபட்டி மற்றும் திருச்சுனை ஆகிய இடங்களில், அரசு புறம்போக்கு நிலங்களில் கிரானைட் குவாரி உரிமம் வழங்க பொது ஏலத்திற்கான விண்ணப்பம் வரவேற்கப்படுகிறது என மாவட்ட நிர்வாகம் தெரிவித்துள்ளது.
