தென்காசியில் இருந்து நவம்பர் 9-ம் தேதி புறப்படும் பாரத் கௌரவ் எனப்படும் தீபாவளி சுற்றுலா இரயிலில் காசிக்குச் செல்ல விருப்பமுள்ள பயணிகள் முன்பதிவு செய்து கொள்ளலாம் என்று அறிவிக்கப்பட்டிருக்கிறது.
இந்திய இரயில்வேயின் ஐ.ஆர்.சி.டி.சி. சுற்றுலாப் பயணிகளுக்காக பாரத் கௌரவ் என்கிற பெயரில் சுற்றுலா இரயிலை அறிமுகப்படுத்தி இருக்கிறது. இந்த இரயில், தீபாவளி கங்கா ஸ்நானம் சிறப்பு யாத்திரை என்கிற பெயரில் தென்காசியில் இருந்து நவம்பர் 9-ம் தேதி புறப்படுகிறது.
இந்த சுற்றுலா இரயில், தென்காசியில் புறப்பட்டு ராஜபாளையம், சிவகாசி, விருதுநகர், மதுரை, திருச்சி, தஞ்சாவூர், கும்பகோணம், மயிலாடுதுறை, சிதம்பரம், சென்னை, காசி, அலகாபாத், கயா வழியாக காசியைச் சென்றடையும். அங்கு, தீபாவளி தினத்தன்று காசியில் உள்ள கங்கை நதியில் புனித நீராடுதலுடன் சுற்றுலா தொடங்குகிறது.
பின்னர், இந்த இரயில், நவம்பர் 16-ம் தேதி இராமேஸ்வரத்தை வந்தயும். தொடர்ந்து, இராமேஸ்வரத்தில் இராமநாதசுவாமி தரிசனத்தோடு சுற்றுலா நிறைவடையும். பிறகு, நவம்பர் 17-ம் தேதி இந்த இரயில் மீண்டும் தென்காசியை சென்றடையும். இந்த இரயிலில் 3 அடுக்கு குளிர்சாதன பெட்டிகள், 8 படுக்கை வசதி கொண்ட பெட்டிகள், ஒரு பேட்டரி கார், 2 பவர் கார்கள் உள்ளிட்ட வசதிகள் இடம்பெறும்.
மேலும், சுற்றுலாப் பகுதிகளை பார்வையிட பஸ் போக்குவரத்து, தென்னிந்திய சைவ உணவுகள், சுற்றுலா மேலாளர், தனியார் பாதுகாவலர், பயண காப்புறுதி, ஏ.சி. மற்றும் ஏ.சி. வசதி இல்லாத தங்கும் இடம் உள்ளிட்ட ஏற்பாடுகள் செய்து தரப்படும். தவிர, மத்திய, மாநில அரசு பொதுத்துறை ஊழியர்கள் பயணித்தால் எல்.டி.சி. சான்றிதழ் வழங்கப்படும்.
இந்த சுற்றுலாவுக்கு பயணக் கட்டணமாக படுக்கை வசதிக்கு 16,850 ரூபாயும், மூன்றடுக்கு ஏ.சி. வகுப்புகளுக்கு 30,500 ரூபாயும் வசூலிக்கப்படுகிறது. மொத்தமுள்ள 600 இருக்கைகளில் இதுவரை 300-க்கும் மேற்பட்ட இருக்கைகள் முன்பதிவு செய்யப்பட்டு விட்டன. எனவே, பயணிகள் விரைந்து இந்த சேவையை பயன்படுத்திக் கொள்ளும்படி, ஐ.ஆர்.சி.டி.சி. தென்மண்டல பொதுமேலாளர் ராஜலிங்கம் பாஸு தெரிவித்திருக்கிறார்.
