கோயம்பேடு: ஆயுத பூஜையையொட்டி சிறப்பு சந்தை!

கோயம்பேடு மார்க்கெட்டில் உள்ள மலர் அங்காடி வளாகத்தில் ஆயுத பூஜையையொட்டி, இன்று சிறப்பு சந்தை தொடங்கியது.

ஆயுத பூஜையையொட்டி, இன்று கோயம்பேடு மார்க்கெட்டில் உள்ள மலர் அங்காடி வளாகத்தில் சிறப்பு சந்தை தொடங்கியது.

சென்னை கோயம்பேடு மார்க்கெட்டில் ஆண்டுதோறும் விநாயகர் சதுர்த்தி, ஆயுத பூஜை, பொங்கல் பண்டிகை உள்ளிட்ட விழாக் காலங்களில் சிறப்பு சந்தை திறக்கப்படுவது வழக்கம். கோயம்பேடு மலர் அங்காடி வளாகத்தில் இந்த சிறப்பு சந்தை திறக்கப்படும். இந்த சந்தையில் பொருட்கள் குறைந்த விலையில் விற்பனை செய்யப்படும்.

இந்த சந்தையானது, கோயம்பேடு மார்க்கெட் நிர்வாகம் மூலம் ஏலம் விடப்பட்டு, ஒப்பந்ததாரர் மூலம் நடத்தப்படும். இந்த முறை சிறப்பு சந்தை நடத்துவதற்காக ஏலம் விடப்படவில்லை. கோயம்பேடு மார்க்கெட் நிர்வாகமே நேரடியாகச் சிறப்பு சந்தையை நடத்துகிறது.

அதன்படி ஆயுத பூஜையையொட்டி, இன்று கோயம்பேடு மார்க்கெட்டில் உள்ள மலர் அங்காடி வளாகத்தில் சிறப்பு சந்தை தொடங்கியது. இந்த சிறப்பு சந்தையில் நவராத்திரி மற்றும் ஆயுத பூஜையைக் கொண்டாடுவதற்குத் தேவையான பொருட்கள் விற்பனை செய்யப்படுகின்றன.

இந்த சந்தையில் பூஜை பொருட்களான பொரி, கடலை, வாழைப்பழம், வாழைக்கன்று, வாழை இலை, தேங்காய், கரும்பு போன்ற பொருட்கள் விற்பனை செய்யப்படுகின்றன. மேலும் ஆப்பிள், சாத்துக்குடி, மாதுளை உள்ளிட்ட பூஜையில் வைப்பதற்குத் தேவையான அனைத்து பழங்களும் விற்கப்படுகிறது. சாமி படங்களுக்கு அணிவிப்பதற்கான சாமந்தி உள்ளிட்ட அனைத்து வகையான பூக்களும் விற்பனை செய்யப்படுகின்றன.

சிறப்பு சந்தை திறக்கப்பட்டதையொட்டி பொதுமக்கள் இங்கு வந்து வீடுகளுக்குத் தேவையான பூஜை பொருட்களைக் குறைந்த விலையில் வாங்கி சென்றனர். இந்த சிறப்பு சந்தை வரும் 27-ஆம் தேதி வரை நடக்க உள்ளது.