தமிழகத்தில் தென்மேற்கு பருவமழை விலகிய நிலையில், இன்னும் 3 நாளில் வடகிழக்கு பருவமழை தொடங்கும் என்று சென்னை வானிலை ஆய்வு மையம் தெரிவித்துள்ளது.
இது தொடர்பாக தென்மண்டல வானிலை ஆய்வு மைய தலைவர் பாலச்சந்திரன் சென்னையில் செய்தியாளர்களை சந்தித்தார். அப்போது, “தமிழகத்தில் இருந்து தென்மேற்கு பருவமழை இன்றுடன் விலகியதாக கூறினார். மேலும் தமிழகம் உள்ளிட்ட தென்னிந்திய பகுதிகளில் இன்னும் 3 நாட்களில் வடகிழக்கு பருவமழை தொடங்கும் என்றும், இயல்பையொட்டியே மழை பெய்யும் என்றும் பாலச்சந்திரன் தெரிவித்தார்.
தமிழகம், புதுச்சேரியில் ஒரு வாரத்துக்கு மிதமான மழை பெய்யும் என்றும், வங்கக்கடலில் 21-ஆம் தேதி காற்றழுத்த தாழ்வு பகுதி உருவாகி அது தாழ்வு மண்டலமாக வலுவடையும். சூறாவளிக்காற்று வீசும் என்பதால் வங்கக்கடல், அரபிக்கடலுக்கு 23-ஆம் தேதி வரை மீனவர்கள் செல்ல வேண்டாம் என்றும் அறிவுறுத்தினார்.
தொடர்ந்து அவர் பேசுகையில், தமிழகத்தில் பதிவான தென் மேற்கு பருவமழையின் அளவு 354 மில்லி மீட்டர் ஆகும். இது இயல்பைவிட 8 சதவீதம் அதிகம். சென்னையில் பதிவான மழையின் அளவு 779 மில்லி மீட்டர் ஆகும். இது இயல்பைவிட 74 சதவீதம் அதிகம்.
வட கிழக்கு பருவமழை தமிழகம், கேரளா, தெற்கு கர்நாடகா, தெற்கு ஆந்திரா, ராயலசீமா உள்ளிட்ட 5 பகுதிகளில் இயல்பை ஒட்டி இருக்கும். தமிழகத்திலும் இயல்பை ஒட்டி இருக்கும் என எதிர்பார்க்கலாம். தென் இந்தியப் பகுதிகளில் வட கிழக்கு பருவமழையின் இயல்பு அளவு 33 சென்டி மீட்டர் ஆகும். இந்த ஆண்டு 29 சென்டி மீட்டர் முதல் 37 சென்டி மீட்டர் வரை எதிர்பார்க்கலாம்” என்று கூறினார்.
