ஒரு நாள் உலகக்கோப்பை கிரிக்கெட் தொடரில் இன்றைய போட்டியில் ஆஸ்திரேலியா மற்றும் பாகிஸ்தான் அணிகள் விளையாடவுள்ளன.
ஒரு நாள் உலகக் கோப்பை கிரிக்கெட் தொடரில் இன்றைய 18வது போட்டி எம்.சின்னசாமி மைதானத்தில் இன்று ஆஸ்திரேலியா மற்றும் பாகிஸ்தான் அணிகள் பலப்பரீட்சை நடத்தவுள்ளது.
உலகக் கோப்பை 2023ல் முதல் இரண்டு போட்டிகளில் தோல்வியை சந்தித்த ஆஸ்திரேலியா அணி, இலங்கை அணிக்கு எதிரான போட்டியில் வெற்றிபெற்றது. அதேபோல், இந்தியாவுக்கு எதிராக படுதோல்வி அடைந்த பாகிஸ்தான் தற்போது அடுத்த போட்டிக்காக பெங்களூரு வந்துள்ளனர்.
இரு அணிகளுக்கும் இடையே 107 ஒருநாள் போட்டிகள் நடைபெற்றுள்ளன. ஆஸ்திரேலியா 69 போட்டிகளில் வெற்றி பெற்றுள்ளது. பாகிஸ்தான் 34 போட்டிகளில் வெற்றி பெற்றுள்ளது. 3 போட்டிகள் எந்த முடிவும் இல்லாமல் முடிவடைந்தது. ஒரு போட்டி டிரா ஆனது.
ஒருநாள் உலகக் கோப்பை வரலாற்றில் இரு அணிகளும் 10 முறை நேருக்கு நேர் மோதியுள்ளன. இதில் ஆஸ்திரேலியா 6 போட்டிகளிலும், பாகிஸ்தான் 4 போட்டிகளிலும் வெற்றிப் பெற்றுள்ளது.
கடந்த போட்டியில் இலங்கைக்கு எதிராக சிறப்பாக விளையாடிய ஆஸ்திரேலியா, இலங்கையை பெரிய ஸ்கோரை அடிக்கவிடாமல் தடுத்தது. ஆடம் ஜாம்பா உள்பட அனைத்து பந்துவீச்சாளர்களும் விக்கெட்டுகளை வீழ்த்த, பேட்டிங்கில் மிட்செல் மார்ஷ் மற்றும் ஜோஸ் இங்கிலிஸ் ஆகியோர் உலகக் கோப்பையில் முதல் அரைசதங்களை பதிவு செய்தனர்.
ஆடம் ஜம்பாவுக்கு 150 ஒருநாள் கிரிக்கெட்டில் விக்கெட்களை எடுக்க 3 விக்கெட்டுகள் மட்டுமே தேவையாக உள்ளது. புள்ளிவிவரங்களின்படி, கடந்த ஏழு பதிப்புகளிலும் ஆஸ்திரேலியா ஒவ்வொரு முறையும் நாக் அவுட் கட்டத்தை எட்டியுள்ளது.
உலகக் கோப்பையில் முதல் இரண்டு போட்டிகளில் வெற்றியுடன் வலுவான தொடக்கத்தை பெற்ற பாகிஸ்தான், இந்தியாவிற்கு எதிரான போட்டியில் தோல்வியை சந்தித்தது. கேப்டன் மற்றும் பேட்ஸ்மேனாக பாபர் அசாம் இன்னும் சிறப்பாக செயல்பட வேண்டும். கடந்த 19 ஒருநாள் போட்டிகளில், ஷஹீன் அப்ரிடி ஒவ்வொரு போட்டியிலும் விக்கெட்டுகளை வீழ்த்தியுள்ளார்.
பெங்களூருவில் உள்ள எம். சின்னசாமி ஸ்டேடியம் ஆடுகளம் பேட்டிங்கு செய்யும் வீரர்களுக்கு சொர்க்கம் என்றே கூறலாம். எனவே, இன்றைய போட்டியில் கிரிக்கெட் ரசிகர்கள் அதிக ஸ்கோரை இங்கு எதிர்பார்க்கலாம். டாஸ் வெல்லும் அணி முதலில் பந்துவீச்சை தேர்வு செய்ய வாய்ப்புள்ளது.
மேலும் வெற்றி வாய்ப்பு கணக்கெடுப்பில் ஆஸ்திரேலியா அணி 62% வெற்றி பெரும் என்றும் பாகிஸ்தான் அணி 38% வெற்றி பெரும் என்றும் இணையத்தில் பதிவிடப்பட்டுள்ளது.
