திருச்சி விமான நிலையத்திற்கு வெடிகுண்டு மிரட்டல் விடுத்த, மன நலம் பாதிக்கப்பட்ட பெண்ணை எச்சரித்து அதிகாரிகள் அனுப்பி வைத்தனர்.
திருச்சி விமான நிலையத்திலிருந்து இலங்கை, மலேசியா, சிங்கப்பூர், ஓமன், துபாய் உள்ளிட்ட பல்வேறு வெளி நாடுகளுக்கும், சென்னை, டெல்லி, பெங்களூர் உள்ளிட்ட பெரு நகரங்களுக்கும் விமானங்கள் இயக்கப்பட்டு வருகிறது. இங்கு நாள்தோறும் 34 விமானச் சேவைகள் உள்ளதால், ஏராளமான வெளிநாட்டு மற்றும் உள்நாட்டுப் பயணிகள் வந்து செல்கின்றனர்.
இந்த நிலையில், இன்று அதிகாலை திருச்சி விமான நிலைய முனைய மேலாளர் தொலைப்பேசி எண்ணுக்கு மெசேஜ் வந்தது. அதில் திருச்சி விமான நிலையத்திற்கு வரும் 34 விமானங்களில் அரிவாள் உள்ளிட்ட பயங்கர ஆயுதங்களும், வெடிகுண்டுகளும் இருப்பதாகவும், விமானங்களில் உடனடியாக சோதனை மேற்கொள்ளுங்கள் என்று மிரட்டல் விடுக்கும் வகையில் இருந்தது.
இதுகுறித்து திருச்சி விமான நிலைய முனைய மேலாளர், மத்திய தொழில் பாதுகாப்புப் படையினருக்குத் தகவல் கொடுத்தார். தொடர்ந்து மத்திய தொழில் பாதுகாப்பு படையினர், வெடிகுண்டு நிபுணர்களின் உதவியுடன், விமான நிலையம் முழுவதும் சோதனை
செய்தனர்.இருப்பினும் வெடிகுண்டு ஏதும் கண்டறியப்படவில்லை. இதை அடுத்து வாட்சப் மெசேஜ் அனுப்பிய, சென்னை மடிப்பாக்கத்தைச் சேர்ந்த, சங்கீதா வேலப்பனிடம் விசாரணை மேற்கொண்டதில், அவர் சற்று மனநலம் பாதிக்கப்பட்டவர் என்பது தெரியவந்தது.
இதையடுத்து அவர் மீது வழக்குப்பதிவு செய்யாமல், இதுபோன்ற நடவடிக்கையில் ஈடுபடக்கூடாது என எச்சரிக்கை விடுத்து அனுப்பி வைத்தனர்.
கடந்த சில மாதங்களுக்கு முன்பு இதுபோன்று மனநலம் பாதிக்கப்பட்ட வாலிபர் விமான நிலையத்துக்கு வெடிகுண்டு மிரட்டல் விடுத்திருந்தார் என்பது குறிப்பிடத்தக்கது.
