விராலிமலையில் ஒரே இரவில் 8 கடைகளில் கொள்ளை நடைபெற்ற சம்பவம் அந்த பகுதியில் பெரும் பரபரப்பை ஏற்படுத்தியுள்ளது.
புதுக்கோட்டை மாவட்டம் விராலிமலை பகுதியில் பிரதான சாலைகளில் ஏராளமான கடைகள் உள்ளன. ஆயுத பூஜையையொட்டி, பல்வேறு கடை உரிமையாளர்கள் நேற்று முன்தினமே கடைகளில் பூஜை நடத்திவிட்டு, கடையை பூட்டிச் சென்றுவிட்டனர்.
மேலும், ஆயுத பூஜையையொட்டி, பெரும்பாலான கடைகள் விடுமுறை அளித்திருந்தன.
இந்த நிலையில், விராலிமலை பகுதியில் உள்ள ஒரு சில கடைகளில் பூட்டு உடைக்கப்பட்டு இருந்தது. தகவல் அறிந்து விரைந்து வந்த கடை உரிமையாளர்கள் சிலர், கடை உள்ளே சென்று பார்த்த போது, அங்கிருந்த மடிக்கணினி, மின்னனு சாதனங்கள் திருடப்பட்டிருந்தது தெரிய வந்தது.
இது குறித்த புகாரின் பேரில், காவல்துறையினர் வழக்குப் பதிவு செய்து, அருகில் உள்ள சிசிடிவி காட்சிகளை ஆய்வு செய்து வருகின்றனர்.
மேலும், திருச்சி தேசிய நெடுஞ்சாலையில் உள்ள முருகன் கோவில் உண்டியல் உடைக்கப்பட்டு அதிலிருந்த பணமும் கொள்ளையடிக்கப்பட்டுள்ளது. இந்த தகவல் அறிந்து அக்கம் பக்கத்தில் குடியிருப்பவர்கள் கூடினர். தகவல் அறிந்து சம்பவ இடத்திற்கு வந்த போலீசார், கைரேகை நிபுணர்களை வரவழைத்து விசாரணை நடத்தி வருகின்றனர்.
இதனால், அந்த பகுதியில் பெரும் பரபரப்பு ஏற்பட்டுள்ளது.
