விமானத்தில் கடத்தி வரப்பட்ட, 1.5 கோடி ரூபாய் மதிப்புள்ள, 2.4 கிலோ தங்கம் பறிமுதல் செய்யப்பட்டு விசாரணை நடத்தப்பட்டு வருகிறது.
ஐக்கிய அரபு நாடுகளின் தலைநகரான அபுதாபியில் இருந்து, இண்டிகோ ஏர்லைன்ஸ் பயணிகள் விமானம் நேற்று காலை சென்னை சர்வதேச விமான நிலையத்திற்கு வந்தது. அந்த விமானம் மீண்டும் உள்நாட்டு விமானமாக, காலை 10 மணிக்கு, சென்னையில் இருந்து ஹைதராபாத் புறப்பட்டுச் செல்ல இருந்தது. அதற்கு முன்பாக, விமான நிலைய ஊழியர்கள் அந்த விமானத்தைச் சுத்தப்படுத்தும் பணியில் ஈடுபட்டனர். அப்போது விமானத்தின் கழிவறை தண்ணீர் தொட்டியில் பார்சல் இருப்பதைப் பார்த்துள்ளனர்.
இதுகுறித்து ஊழியர்கள், சென்னை விமான நிலைய மேலாளருக்குத் தகவல் தெரிவித்தனர். அந்த பார்சலை பிரித்துப் பார்த்து போது, அதில் 2.4 கிலோ தங்கக்கட்டிகள் இருந்தன. இதன் சர்வதேச மதிப்பு, 1.5 கோடி ரூபாய். விமானத்தின் கழிவறைத் தொட்டியில் கைப்பற்றப்பட்ட தங்கக் கட்டிகள், சுங்க அதிகாரிகளிடம் ஒப்படைக்கப்பட்டது.
இதன் முதற்கட்ட விசாரணையில், அபுதாபியில் இருந்து தங்கத்தைக் கடத்தி வந்த மர்ம நபர், தங்கத்தை விமானத்தில் உள்ள கழிவறை தண்ணீர் தொட்டியில் மறைத்து வைத்துவிட்டு, கீழே இறங்கி வெளியில் சென்று உள்ளார்.
அதே கடத்தல் கும்பலைச் சேர்ந்த மற்றொரு மர்ம நபர், இந்த விமானத்தில் ஹைதராபாத் செல்வதற்கு உள்நாட்டுப் பயணிகள் விமான டிக்கெட் எடுத்து, இந்த விமானத்தில் பயணித்து, ஹைதராபாத் சென்றதும், இந்த தங்கக் கட்டியை எடுத்துவிட்டு வெளியில் செல்ல திட்டமிட்டு இருக்கிறார் என்பது தெரியவந்துள்ளது.
விமான நிலையத்தில் உள்ள கண்காணிப்பு கேமரா காட்சிகளைக் கொண்டு, கடத்தல் கும்பலைச் சேர்ந்தவர்களை அதிகாரிகள் தேடி வருகின்றனர்.
