பாரா ஆசிய விளையாட்டில் இரண்டாவது நாள் தொடக்கத்திலேயே இந்திய வீரர், வீராங்கனைகள் நான்கு பதக்கங்களை குவித்துள்ளனர்.
நான்காவது ஆசிய பாரா விளையாட்டு போட்டிகள் சினாவின் ஹாங்சோவ் நகரில் தொடங்கியுள்ளது. வரும் 28ம் தேதி வரையில் 22 விளையாட்டு போட்டிகள் 24 பிரிவுகளில் 566 தங்கப் பதக்கத்திற்கான போட்டிகள் நடைபெறுகின்றன.
இதற்காக இந்தியா சார்பில் 196 ஆண்கள் மற்றும் 113 பெண்கள் என 309 தடகள வீரர், விராங்கனைகள் சீனா சென்றுள்ளனர். இவர்கள் 17 பிரிவுகளில் களமிறங்க உள்ளனர். முதல் நாள் முடிவில் இந்திய வீரர், வீராங்கனைகள் 6 தங்கம், 6 வெள்ளி மற்றும் 5 வெண்கலம் என மொத்தம் 17 பதக்கங்களை வென்றனர்.
இந்நிலையில் இரண்டாவது நாளான இன்று மகளிர் படகு போட்டி KL2 பிரிவில், இந்திய வீராங்கனை பிராச்சி யாதவ் தங்கம் வென்று அசத்தியுள்ளார். பந்தய தூரத்தை 54.962 வினாடிகளில் கடந்து பிராச்சி யாதவ் தங்கம் வென்றார்.
அவரை தொடர்ந்து, சீனாவின் ஷான்ஷன் வாங் 55.674 விநாடிகளில் கடந்து வெள்ளிப்பதக்கத்தையும், ஈரானின் ரோயா சோல்டானி 56.714 விநாடிகளில் கடந்து வெண்கலப் பதக்கத்தையும் கைப்பற்றினர்.
முன்னதாக, முதல் நாள் நடைபெற்ற மகளிருக்கான VL2 பிரிவின் இறுதிப் போட்டியிலும், பிராச்சி யாதவ் வெள்ளிப் பதக்கம் வென்றது குறிப்பிடத்தக்கது.
