எதிர்வரும் 2024 மக்களவைத் தேர்தலில் பா.ஜ.க. 400 இடங்களுக்கு மேல் வெற்றி பெற்று ஆட்சி அமைக்கும். தமிழகத்தில் மாநிலத் தலைவர் அண்ணாமலை தலைமையில் பல இடங்களில் வெற்றி பெறுவோம் என்று கோவா முதல்வர் பிரமோத் சாவந்த் நம்பிக்கை தெரிவித்தார்.
பசும்பொன் முத்துராமலிங்கத் தேவரின் 116-வது ஜெயந்தி விழா மற்றும் 61-வது குருபூஜை விழா நடைபெற்றது. இதில் பங்கேற்க, இராமநாதபுரம் மாவட்டம் பசும்பொன் செல்வதற்காக, கோவா முதல்வர் பிரமோத் சாவந்த் சென்னையிலிருந்து விமான மூலம் மதுரை விமான நிலையத்துக்கு வந்தார். அவருக்கு தமிழக பா.ஜ.க. தலைவர் அண்ணாமலை மற்றும் நிர்வாகிகள் உற்சாக வரவேற்பு அளித்தனர்.
இதைத் தொடர்ந்து, மதுரை விமானத்தில் செய்தியாளர்கள் எழுப்பிய பல்வேறு கேள்விகளுக்கு பதிலளித்த முதல்வர் பிரமோத் சாவந்த், “எதிர்கட்சிகளின் கூட்டணியை இந்தியா கூட்டணி என்று சொல்லக்கூடாது. அது ’இண்டி’ கூட்டணி என்பதை முதலில் புரிந்து கொள்ளுங்கள். அந்தக் கூட்டணியில் எந்தத் தலைவரும் இல்லை. குறிப்பாக, இந்தியாவை ஆள பிரதமர் நரேந்திர மோடி போன்று எந்தத் தலைவரும் இல்லை. இம்முறை 300 அல்ல 400 இடங்களுக்கு மேல் பெற்று ஆட்சி அமைப்போம்.
கடந்த 60 ஆண்டுகளில் இந்தியா காணாத வளர்ச்சியை, இந்த 10 ஆண்டுகளில் பிரதமர் நரேந்திர மோடி மாற்றி இருக்கிறார். மனிதவள மேம்பாடு மற்றும் நாட்டின் உள்கட்டமைப்பு வளர்ச்சி என இரண்டுக்கும் முக்கியத்துவம் கொடுத்திருக்கிறார். தமிழகத்தில் மாநிலத் தலைவர் அண்ணாமலை தலைமையில் பல இடங்களில் வெற்றி பெறுவோம்.
தனிப்பட்ட முறையில் நான் 4 மாநிலங்களுக்குச் சென்று வந்திருக்கிறேன். ராஜஸ்தான், மத்தியப் பிரதேசம், சத்தீஸ்கர் ஆகிய 3 மாநிலங்களில் பா.ஜ.க. நிச்சயம் வெற்றி பெறும். தெலங்கானா மற்றும் மிசோரம் மாநிலங்களில் பா.ஜ.க. சிறப்பாக செயல்பட்டு வருகிறது. இதிலும் நிச்சயம் வெற்றி பெறுவோம். 5 மாநிலங்களில் 4 மாநிலங்களில் பெரும்பான்மையாக வெற்றி பெற்று ஆட்சி அமைப்போம்.
தமிழகத்தில் பிரதமர் நரேந்திர மோடி போட்டியிடுவது குறித்து எங்கள் கட்சியின் தேசியத் தலைவர்கள் முடிவெடுப்பார்கள். கடந்த 9 ஆண்டுகளில் பிரதமர் செய்த சாதனையை வைத்து 100% மீண்டும் பிரதமராக வருவார். தமிழகம் மட்டுமல்ல அனைத்து மாநிலங்களிலும் கட்டமைப்பு வளர்ச்சிக்கு பல்வேறு திட்டங்களை பிரதமர் மோடி செய்திருக்கிறார். இந்த வளர்ச்சிகளின் மூலம் மக்கள் மோடிக்கு வாக்களிப்பார்கள். மீண்டும் ஆட்சியில் அமர்த்துவார்கள்” என்றார்.
