பாகிஸ்தானில் பிப்ரவரி 11-ம் தேதி பொதுத் தேர்தல் நடைபெறும் என அந்நாட்டு தேர்தல் ஆணையம் உச்ச நீதிமன்றத்தில் தெரிவித்துள்ளது.
பாகிஸ்தானில் 2022-ம் ஆண்டு ஏப்ரலில் பிரதமராக இருந்த இம்ரான் கானின் அரசு, நம்பிக்கையில்லா தீர்மானத்தின் மூலம் கவிழ்க்கப்பட்டது. பின்னர் அவர் பல்வேறு வழக்குகளில் சிறையில் அடைக்கப்பட்டார். கடந்த ஆகஸ்ட் 9ஆம் தேதி நாடாளுமன்றம் கலைக்கப்பட்டது.
இந்நிலையில் நாடாளுமன்ற கலைக்கப்பட்டு 90 நாட்களுக்குள் தேர்தல் நடத்த வேண்டும் என்ற விதியை சுட்டிக்காட்டி பாகிஸ்தான் உச்ச நீதிமன்றத்தில் பல்வேறு பொதுநல வழக்குகள் தாக்கல் செய்யப்பட்டன. அந்த கெடு நவம்பர் 7ஆம் தேதியுடன் நிறைவடைகிறது. இதுதொடர்பான விசாரணை 3 பேர் கொண்ட அமர்வில் இன்று மீண்டும் விசாரணைக்கு வந்தது.
அப்போது தேர்தல் ஆணையம் சார்பில் ஆஜரான வழக்கறிஞர், அடுத்த ஆண்டு பிப்ரவரி 11-ந்தேதி பொதுத்தேர்தல் நடத்தப்படும் என தெரிவித்தார். வேட்பு மனுத்தாக்கல், வாபஸ் உள்ளிட்ட மற்ற விவரங்கள் ஏதும் வெளியாகவில்லை என்பது குறிப்பிடத்தக்கது.
