திருநெல்வேலி அருகே உள்ள அருள்மிகு திருமலைநம்பி திருக்கோவிலுக்கு பக்தர்கள் செல்ல வனத்துறையினர் விதித்த தடை விலக்கிக் கொள்ளப்பட்டது.
திருநெல்வேலி மாவட்டம், களக்காடு அருகே உள்ள திருக்குறுங்குடி மேற்கு தொடர்ச்சி
மலையில் அடர்ந்த வனப்பகுதியில் அருள்மிகு ஸ்ரீதிருமலைநம்பி திருக்கோவில் அமைந்துள்ளது.
108 வைணவ திவ்ய தேசங்களில் ஒன்றாக திகழும் இந்த திருக்கோவில் ஆழ்வார்களால் மங்களாசாசனம்
செய்யப்பட்டது.
பிரசித்திப் பெற்ற இந்த திருக்கோவிலில் சனிக்கிழமைகளிலும், தமிழ் மாதங்களின் முதல் மற்றும் கடைசி சனிக்கிழமைகளிலும் அதிக அளவு பக்தர்கள் வருவது வழக்கம். அப்போது, சிறப்பு வழிபாடுகள் நடத்தப்படும்.
திருக்குறுங்குடியில் கனமழை காரணமாக வனப்பகுதியில் ஓடும் நம்பியாற்றில் கடும் வெள்ளப் பெருக்கு ஏற்பட்டது. இரு கரைகளை தொட்டப்படி வெள்ளம் கரை புரண்டு ஓடியது. இதனால், திருமலைநம்பி திருக்கோவிலுக்கு பக்தர்கள் செல்ல வனத்துறையினர் தடை விதித்தனர்.
இந்த நிலையில், மழையும், ஆற்றில் கரை புரண்ட வெள்ளமும் தணிந்தது. இதனால், திருமலைநம்பி திருக்கோவிலுக்கு செல்ல பக்தர்களுக்கு விதிக்கப்பட்டிருந்த தடை விலக்கப்பட்டு, அனுமதி வழங்கப்பட்டது. இதனால், திருக்கோவிலுக்கு ஏராளமானோர் சுவாமி தரிசனம் செய்தனர்.
