மருத்துவமனையில் அனுமதிக்கப்பட்டிருந்த தெலுங்கு நடிகர் சந்திரமோகன் சிகிச்சை பலனின்றி இன்று காலமானார்.
1975ஆம் ஆண்டு எம்ஜிஆர் நடிப்பில் வெளியான படம் ‘நாளை நமதே’ படத்தில் எம்ஜிஆருக்கு தம்பியாக நடிகர் சந்திரமோகன் (வயது 82) நடித்தார்.
1966ஆம் ஆண்டு வெளியான ‘ரங்குல ரத்னம்’ படத்தின் மூலம் அறிமுகமான இவர், மறைந்த இயக்குநர் கே.விஸ்வநாத்தின் உறவினர் ஆவார். தொடர்ந்து தெலுங்கில் ஏராளமான படங்களில் நடித்துள்ளார் சந்திரமோகன். இரண்டு நந்தி விருதுகள், ஒரு ஃபிலிம்ஃபேர் விருது ஆகிய விருதுகளை வென்றுள்ளார்.
தமிழில் கமல், ஸ்ரீபிரியா நடித்த ‘நீயா’ படத்தில் ஒரு முக்கிய கதாபாத்திரத்தில் நடித்திருந்தார். சமீபத்தில் மறைந்த நடிகர் சரத்பாபுவுக்கு மருத்துவமனையில் பல உதவிகளை செய்திருந்தார்.
இந்த நிலையில், இதயநோய் காரணமாக ஹைதரபாத்தில் உள்ள தனியார் மருத்துவமனையில் அனுமதிக்கப்பட்டிருந்த சந்திரமோகன், சிகிச்சை பலனின்றி இன்று உயிரிழந்தார். வரும் திங்கள்கிழமை ஹைதராபாத்தில் சந்திரமோகனின் இறுதிச்சடங்கு நடைபெறுகிறது. அவரது மறைவுக்கு தெலுங்கு திரையுலகினர் பலரும் இரங்கல் தெரிவித்துள்ளனர்.
