இலங்கையில் சக்தி வாய்ந்த நிலநடுக்கம்!

இலங்கையில் இன்று பிற்பகல் சக்தி வாய்ந்த நிலநடுக்கம் ஏற்பட்டது. இது ரிக்டர் அளவில் 6.2 ஆக பதிவாகி உள்ளது.

இலங்கையில் இன்று பிற்பகல் 12.31 மணியளவில் நிலநடுக்கம் உணரப்பட்டது. இலங்கை தலைநகர் கொழும்புவில் இருந்து ஆயிரத்து 326 கிலோ மீட்டர் தொலைவில் நிலநடுக்கம் ஏற்பட்டது. இந்தியப் பெருங்கடலில் 10 கிலோ மீட்டர் ஆழத்தில் மையம் கொண்டிருந்த இந்த நிலநடுக்கம் ரிக்டர் அளவுகோலில் 6.2 ஆகப் பதிவாகி உள்ளது.

கொழும்புவில் உள்ள பல பகுதிகளில் நிலநடுக்கம் உணரப்பட்டது. கடல் பகுதியில் நிலநடுக்கம் ஏற்பட்டதால், பெருத்த சேதம் இருக்காது என்று கூறப்படுகிறது. மேலும், சுனாமி எச்சரிக்கை எதுவும் விடுக்கப்படவில்லை.

இலங்கை அருகே நடுக்கடலில் சக்திவாய்ந்த நிலநடுக்கம் ஏற்பட்டதன் காரணமாக, தூத்துக்குடி மாவட்டம் திருச்செந்தூர் முருகன் கோவிலுக்குச் செல்லும் பக்தர்கள் கடலில் குளிக்கத் தடை விதிக்கப்பட்டுள்ளது. திருச்செந்தூர் கடல் சீற்றத்துடன் காணப்படுகிறது. கடலில் பக்தர்கள் யாரும் குளிக்காமல் இருக்கக் கடலோர குழும காவல்துறை பாதுகாப்புப் பணியில் ஈடுபட்டுள்ளனர்.

இதற்கிடையே, இலங்கையில் இன்று இடியுடன் கூடிய பலத்த மழை பெய்யக்கூடும் என எச்சரிக்கப்பட்டுள்ளது. வங்கக்கடலில் ஏற்பட்டுள்ள தாழ்வு மண்டலம் காரணமாக மழைப்பொழிவு அதிகம் இருக்கும் என எதிர்பார்க்கப்படுகிறது.