சென்னையில் இன்புளூயன்சா-ஏ வகை காய்ச்சல் பாதிப்பு அதிகரித்துள்ளது.
தமிழகத்தில் மழைக்காலம் தொடங்கினாலே, டெங்கு, சிக்கன்குனியா மற்றும் வைரஸ் காய்ச்சல்கள் அதிகரிக்கும். குறிப்பாக, சென்னையில் அக்டோபர் மற்றும் நவம்பர் மாதங்களில் இந்த நோய் பரவல் உச்சத்தில் இருக்கும்.
இந்த வருடமும் காய்ச்சல் பாதிப்பு அதிகரித்துள்ளது. இதனால், சென்னையில் உள்ள அரசு மற்றும் தனியார் மருத்துவமனைகளில் நோயாளிகள் கூட்டம் அதிகமாகி உள்ளது. வைரஸ் தொற்று காரணமாக, காய்ச்சல், சுவாசப் பிரச்னை மற்றும் உடல் உபாதைகள் ஏற்படுகிறது.
இதுகுறித்து ஆய்வு செய்வதற்காக அரசு மற்றும் தனியார் மருத்துவமனைகளில் காய்ச்சலுக்காக அனுமதிக்கப்பட்டோரின் இரத்த மாதிரிகள் சேகரிக்கப்பட்டு, ஆய்வு செய்யப்பட்டது. 300 பேரின் இரத்த மாதிரிகளை ஆய்வு செய்வதில், பெரும்பாலானோருக்கு இன்புளூயன்சா காய்ச்சல் இருப்பது கண்டுபிடிக்கப்பட்டுள்ளது. குறிப்பாக, இன்புளூயன்சா-ஏ வகை காய்ச்சல் தான் அதிகமான அளவில் இருக்கிறது. இந்த வகை காய்ச்சல் கண்டவர்களுக்கு அதிகமான காய்ச்சல், தலைவலி, உடல் வலி, வாந்தி போன்ற அறிகுறிகள் இருக்கும்.
காய்ச்சல் அதிகரிப்பதைப் பொறுத்து இவற்றை 3 பிரிவுகளாக பிரிக்கப்படுகிறது. பாதிக்கப்பட்டவர்களுக்கு லேசான காய்ச்சல், தொண்டை வலி இருந்தால், சாதாரண முறையில் சிகிச்சை அளிக்கப்படும்.
இதே காய்ச்சல் 5 வயதிற்குட்பட்ட குழந்தைகள், வயதானவர்கள், கர்ப்பிணிகளைத் தாக்கினால் அவர்களுக்கு நோய் எதிர்ப்பு சக்திக்கான மருந்துகளை மருத்துவர்கள் பரிந்துரைப்பார்கள்.
பாதிக்கப்பட்டவர்களுக்கு அதிகமான காய்ச்சல், சளி, தொண்டை வலி மற்றும் வாந்தி போன்றவை இருந்தால் மருத்துவமனைகளில் சேர்க்கப்பட்டு சிகிச்சைகள் அளிக்கப்பட வேண்டும். இல்லாவிட்டால், பாதிக்கப்பட்டவர்களின் உயிருக்கு ஆபத்து ஏற்படும் வாய்ப்புள்ளதாக மருத்துவர்கள் கூறுகின்றனர்.
