கனமழையின் காரணமாக, மேட்டுப்பாளையம் – ஊட்டி மலை இரயில் சேவை ரத்து செய்யப்பட்ட நிலையில், 10 நாட்களுக்குப் பிறகு இன்று முதல் மீண்டும் இயங்க தொடங்கியது. இதனால், சுற்றுலாப் பயணிகள் மகிழ்ச்சி அடைந்துள்ளனர்.
தமிழகத்தில் வடகிழக்கு பருவமழை தொடங்கி, கடந்த சில நாட்களாகக் பல்வேறு மாவட்டங்களில் பரவலாக கனமழை பெய்தது. கனமழை காரணமாக, மேட்டுப்பாளையம் – ஊட்டி மலை இரயில் பாதையில் மண் சரிவு ஏற்பட்டு, இரயில் தண்டவாளத்தில் பாறைகள் உருண்டு விழுந்தன.
இரயில் பாதையோரத்தில் இருந்த மரங்கள் தண்டவாளத்தின் குறுக்கே விழுந்தன. மேலும், மண் அரிப்பு ஏற்பட்டு ஜல்லிக்கற்கள் அடித்து செல்லப்பட்டன. இதன் காரணமாக, கடந்த 9-ஆம் தேதி முதல் 18-ஆம் தேதி வரை மேட்டுப்பாளையம் – ஊட்டி மலை இரயில் சேவை இரத்து செய்யப்பட்டது.
இதைத்தொடர்ந்து, இரயில் பாதையைச் சீரமைக்கும் பணியில் இரயில்வே ஊழியர்கள் ஈடுபட்டனர். நேற்று இரயில் பாதையைச் சீரமைக்கும் பணி முழுவதும் நிறைவடைந்தது. இதை அடுத்து, மேட்டுப்பாளையம் – ஊட்டி மற்றும் ஊட்டி – மேட்டுப்பாளையம் மலை இரயில் சேவை இன்று முதல் மீண்டும் தொடங்கியது.
இன்று காலை 180-க்கும் மேற்பட்ட சுற்றுலாப் பயணிகளுடன் மேட்டுப்பாளையத்தில் இருந்து உதகையை நோக்கி இரயில் புறப்பட்டு சென்றது. 10 நாட்களுக்குப் பிறகு, மலை இரயில் சேவை மீண்டும் தொடங்கியதால், சுற்றுலாப் பயணிகள் மகிழ்ச்சி அடைந்தனர்.
