ராஷ்ட்ரீய ஸ்வயம் சேவக சங்கம் சார்பில் (ஆர்.எஸ்.எஸ்.) தமிழகம் முழுவதும் 55 இடங்களில் இன்று அணிவகுப்பு ஊர்வலம் மற்றும் பொதுக்கூட்டம் நடைபெறுகிறது. அதன்படி, சென்னையில் மட்டும் 3 இடங்களில் அணிவகுப்பு ஊர்வலம் மற்றும் பொதுக்கூட்டம் நடைபெறுகிறது.
விஜயதசமியை முன்னிட்டு, தமிழகம் முழுவதும் 55 இடங்களில் அணிவகுப்பு ஊர்வலம் மற்றும் பொதுக்கூட்டம் நடத்த, ஆர்.எஸ்.எஸ். இயக்கம் சார்பில் அனுமதி கோரப்பட்டது. ஆனால், இதற்கு தமிழக காவல்துறை அனுமதி மறுத்துவிட்டது. எனவே, ஆர்.எஸ்.எஸ். இயக்கம் உயர் நீதிமன்றத்தை நாடியது. இதையடுத்து, உச்ச நீதிமன்ற வழிகாட்டுதலின்படி ஆர்.எஸ்.எஸ். ஊர்வலம் நடத்த உயர் நீதிமன்றம் அனுமதி வழங்கி உத்தரவிட்டது.
அதன்படி, தமிழகம் முழுவதும் 55 இடங்களில் இன்று மாலை ஆர்.எஸ்.எஸ். அணிவகுப்பு ஊர்வலம் மற்றும் பொதுக்கூட்டம் நடைபெறுகிறது. அந்த வகையில், சென்னையில் மணலி, கொரட்டூர், குரோம்பேட்டை ஆகிய 3 இடங்களில் அணிவகுப்பு ஊர்வலமும், பொதுக்கூட்டமும் நடைபெறுகின்றன.
மணலியில் மாத்தூர் எம்.எம்.டி.ஏ. 2-வது பிரதான சாலையிலுள்ள ஸ்ரீராம் மஹால் அருகில் இருந்து மாலை 3 மணியளவில் அணிவகுப்பு ஊர்வலம் தொடங்குகிறது.
அதேபோல, கொரட்டூரில் டாக்டர் நல்லிகுப்புசுவாமி விவேகானந்தா வித்யாலயா ஜூனியர் காலேஜில் இருந்து மாலை 3 மணியளவில் அணிவகுப்பு ஊர்வலம் தொடங்குகிறது. மேலும், குரோம்பேட்டையில் மாதவன் தெருவிலுள்ள விவேகானந்தா பள்ளியில் இருந்து மாலை 4 மணியளவில் அணிவகுப்பு ஊர்வலம் தொடங்குகிறது.
தொடர்ந்து, மேற்கண்ட 3 இடங்களிலும் பொதுக்கூட்டம் நடைபெறுகிறது. ஆகவே, தமிழகத்தில் நடைபெறும் அணிவகுப்பு ஊர்வலம் மற்றும் பொதுக்கூட்டங்களில் சங்கத்தினர் மட்டுமல்லாது தேசபக்தர்கள் அனைவரும் கலந்துகொள்ள வேண்டும் என்று ஆர்.எஸ்.எஸ். இயக்கம் சார்பில் வேண்டுகோள் விடுக்கப்பட்டிருக்கிறது.
