அர்னாப் புயல் பயங்கர சேதத்தை ஏற்படுத்தும் என கணிக்கப்பட்டுள்ள நிலையில் ஆந்திராவில் 5 லட்சத்திற்கும் மேற்பட்டோர் பாதுகாப்பான இடங்களில் தங்கவைக்கப்பட்டுள்ளனர்
விசாகப்பட்டினம் மாவட்டத்தில் உள்ள கடற்கரைகளுக்கு மக்கள் செல்லக்கூடாது என மாவட்ட நிர்வாகம் எச்சரிக்கை விடுத்துள்ளது. அர்னாப் புயல் காரணமாக காக்கிநாடா, விசாகப்பட்டினம் செல்லும் 72 ரயில்கள் ரத்து செய்யப்பட்டுள்ளன. புயல் ஆந்திரப்பிரதேசத்தில் கரையை கடக்கும்போது 200 கிலோ மீட்டர் வேகத்தில் பலத்த காற்று வீசும் என்றும் கடலில் 46 அடி உயரத்திற்கு ராட்சத அலை எழும் என்றும் வானிலை மையம் எச்சரித்துள்ளது. ஒடிசா, ஜார்க்கண்ட் உள்ளிட்ட 4 மாநிலங்களிலும் அக்டோபர் 29 முதல் 31 வரை பலத்த மழை பெய்யக்கூடும் என்றும் ஜார்க்கண்டை கடந்து செல்லும் புயலால் நேபாள நாட்டிலும் பலத்த மழை பெய்யும் என வானிலை மையம் கணித்துள்ளது. வர்தா புயல் சென்னையை கடந்த போது 125 கிலோ மீட்டர் வேகத்தில் காற்று வீசியது. தற்போது உருவாகி உள்ள அர்னாப் புயல், வர்தா புயலை விட மிக கோரமாக இருக்கும் என்றும் கணிக்கப்பட்டுள்ளது
இந்நிலையில் அர்னாப் புயல் காரணமாக விசாகப்பட்டினத்தில் விடாது பெய்து வரும் கனமழையால் நகரின் பல்வேறு பகுதிகள் வெள்ளத்தில் மிதக்கின்றன. குறிப்பாக, கான்வென்ட் சந்திப்பில் ரயில்வே தண்டவாளத்தின் அடியில் அமைந்துள்ள வாகன சுரங்கப்பாதையில் மழைநீர் பெருமளவில் தேங்கியுள்ளது.
