மகளிருக்கான வெற்றிப் பயணத் திட்டத்தைச் செயல்படுத்த ஆண்டுக்கு 12 ஆயிரம் கோடி ரூபாய் தேவை என போக்குவரத்துக் கழகங்கள் கோரிக்கை விடுத்துள்ள நிலையில், 6 ஆயிரம் கோடி ரூபாய் மட்டுமே வழங்க அரசு ஒப்புதல் தெரிவித்துள்ளதாக தகவல் வெளியாகியுள்ளது.
இது தொடர்பாக போக்குவரத்துக் கழக அதிகாரிகள் சார்பில் வெளியிடப்பட்டுள்ள தகவலில், மாநகர, நகரப் பகுதிகளில் இயக்கப்படும் சாதாரண, சொகுசு பேருந்துகள், மாவட்டங்களுக்கு இடையேயான புறநகர் மற்றும் மலைப்பகுதி பேருந்துகளில் மகளிருக்கு இலவச பயணம் அனுமதிக்கப்படுகிறது என்றும், தமிழகம் முழுவதும் 12 ஆயிரத்து 695 பேருந்துகளில் மகளிர் இலவசமாகப் பயணம் செய்து வருகின்றனர் எனவும் தெரிவிக்கப்பட்டுள்ளது.
நாள்தோறும் 84 லட்சத்துக்கும் மேற்பட்டோர் இத்திட்டத்தின் மூலம் பயனடைந்து வருவதாகவும் கூறப்பட்டுள்ளது.
வெற்றி பயண திட்டத்தால் ஏற்படும் வருவாய் இழப்பை ஈடுசெய்ய அரசு இதுவரை நிதி விடுவிக்கவில்லை எனவும் குறிப்பிடப்பட்டுள்ளது.
மகளிருக்கான வெற்றிப் பயணத் திட்டத்தைச் செயல்படுத்த ஆண்டுக்கு 12 ஆயிரம் கோடி ரூபாய் தேவை என்றும், ஆனால், 6 ஆயிரம் கோடி ரூபாய் மட்டுமே வழங்க அரசு ஒப்புதல் அளித்துள்ளதாகவும் கூறப்பட்டுள்ளது.
மேலும், நிதி இல்லாததால் டீசல் மற்றும் உதிரிபாகங்கள் வாங்குவதில் சிரமம் ஏற்படுவதாகவும், பேருந்து சேவைகள் பாதிக்கப்படாமல் இருக்க அரசு விரைந்து நிதி வழங்க வேண்டும் எனவும் அதிகாரிகள் தரப்பில் தெரிவிக்கப்பட்டுள்ளது.
