டெல்லியில் உள்ள சாலையோர கடை ஒன்றில், எலுமிச்சை ஜூஸ் அருந்திய ஆஸ்திரேலிய துணை பிரதமர் ரிச்சர்டு மார்லஸ், அதற்கான பணத்தை யு.பி.ஐ. மூலம் செலுத்தினார்.
ஒரு நாள் உலகக்கோப்பை கிரிக்கெட் தொடரின் இறுதிப்போட்டி குஜராத் மாநிலம் அகமதாபாத்தில் உள்ள நரேந்திர மோடி மைதானத்தில் கடந்த 19-ம் தேதி நடைபெற்றது. இதில் இந்தியா-ஆஸ்திரேலியா அணிகள் விளையாடின.
இறுதிப்போட்டியில், ஆஸ்திரேலிய அணி, 6 விக்கெட்டுகள் வித்தியாசத்தில் வெற்றி பெற்று கோப்பையைக் கைப்பற்றியது. இதற்கு முன்பு, 5 முறை உலக கோப்பையை வென்றுள்ள ஆஸ்திரேலிய அணி, தற்போது 6-வது முறையாக கோப்பையை வென்றுள்ளது.
இதற்கிடையே, உலகக்கோப்பை கிரிக்கெட் இறுதிப் போட்டியைப் பார்ப்பதற்காக இந்தியாவுக்கு வந்த ஆஸ்திரேலியாவின் துணை பிரதமரும், பாதுகாப்பு அமைச்சருமான ரிச்சர்டு மார்லஸுக்கு சிறப்பு வரவேற்பு அளிக்கப்பட்டது.
பின்னர், அகமதாபாத் மைதானத்தில் பிரதமர் மோடியுடன் ஒன்றாக கிரிக்கெட் போட்டியைப் பார்த்து ரசித்தார். இதன் பின், அவர், டெல்லியில் பல்வேறு பகுதிகளுக்கும் சென்று பார்வையிட்டார்.
ஆஸ்திரேலிய துணை பிரதமருக்கு டெல்லியில் முப்படைகளின் அணிவகுப்பு மரியாதை வழங்கப்பட்டது. இதைத்தொடர்ந்து, டெல்லியில் தேசிய போர் நினைவிடத்தில் மலர் வளையம் வைத்து அஞ்சலி செலுத்தினார். பின்னர், தெருவில் கிரிக்கெட் விளையாடி அசத்தினார்.
இதனை அடுத்து, டெல்லியில் உள்ள தெருவோர கடை ஒன்றிற்குச் சென்ற ரிச்சர்டு, மசாலா கலந்த எலுமிச்சை பழ ஜூஸ் வாங்கி அருந்தினார். மேலும், தெருவோர கடை ஒன்றில், ராம் லட்டு ஒன்றை வாங்கி சாப்பிட்ட ஆஸ்திரேலிய துணை பிரதமர், அதற்கான பணத்தை யு.பி.ஐ. மூலம் செலுத்தினார்.
