அமெரிக்க இராணுவத்தின் ஆஸ்ப்ரே விமானம், இன்று தெற்கு ஜப்பான் கடலில் விழுந்து விபத்துக்குள்ளானது. தகவலறிந்த ஜப்பானிய கடலோரக் காவல்படை, அவ்விமானத்தில் பயணம் செய்த 8 பேரையும் தேடும் பணியில் ஈடுபட்டிருக்கிறது.
அமெரிக்க இராணுவத்தின் ஆஸ்ப்ரே விமானம் 8 பேருடன் சென்று கொண்டிருந்தது. டில்ட்ரோட்டர் விமானமான “ஆஸ்ப்ரே”, ஹெலிகாப்டராகவும், டர்போபிராப் விமானமாகவும் செயல்படக்கூடியது. இந்த விமானம் ஜப்பானின் தெற்கு பகுதியில் உள்ள யாகுஷிமா தீவு அருகே இன்று பிற்பகல் 3 மணியளவில் கடலில் விழுந்தது.
இந்த விபத்து குறித்து அப்பகுதியில் மீன்பிடித்துக் கொண்டிருந்த மீனவர்கள், ஜப்பான் கடலோர காவல் படைக்கு தகவல் தெரிவித்தனர். இதையடுத்து, கடலோர காவல் படையினர் ஹெலிகாப்டர் மற்றும் ரோந்து படகுகள் மூலம் சம்பவ இடத்திற்கு விரைந்து சென்று தேடுதல் பணியில் ஈடுபட்டனர்.
இதில் ஒருவர் மீட்கப்பட்டதாகத் தெரிகிறது. மேலும், விமானத்தின் உடைந்த பாகங்களும் அப்பகுதியில் கண்டறியப்பட்டிருக்கிறது. இது விபத்துக்குள்ளான விமானத்தின் பாகங்களாக இருக்கலாம். எனினும், மீட்கப்பட்டவரின் நிலை மற்றும் மற்ற 7 பேரின் நிலை என்ன என்பது குறித்த தகவல் இல்லை.
இதுகுறித்து ஜப்பான் கடலோர காவல் படை செய்தி தொடர்பாளர் கூறுகையில், “இந்த விமானம் யமகுச்சி மாகாணத்தில் உள்ள அமெரிக்காவின் இவாகுனி மரைன் கார்ப்ஸ் விமான நிலையத்தில் இருந்து புறப்பட்டது. இது ஒகினாவாவில் உள்ள கடேனா விமானத் தளத்தை நோக்கி சென்றது. அப்போது விமானம் விபத்துக்குள்ளானதாகத் தெரிகிறது. இந்த விமானம் கடலில் விழுவதற்கு முன்பாக, யாகுஷிமா விமான நிலையத்தில் அவசரமாக தரையிறக்கவும் முயற்சி செய்தது” என்றார்.
