கர்நாடக மாநிலம் பெல்காமில் பழங்குடியினப் பெண் மீது தாக்குதல் நடத்தப்பட்ட சம்பவம் தொடர்பாக விசாரிக்க, பெண் எம்.பி.க்கள் அடங்கிய குழுவை பா.ஜ.க. தலைமை அமைத்திருக்கிறது.
கர்நாடக மாநிலம் பெல்காமில் பழங்குடியின பெண் ஒருவர், அவரது வீட்டில் இருந்து தரதரவென வெளியே இழுத்து வரப்பட்டு, நிர்வாணமாக்கி கம்பத்தில் கட்டி வைத்து தாக்கப்பட்டிருக்கிறார். தாக்குதலுக்கு உள்ளான பெண்ணின் மகன், ஒரு பெண்ணை காதலித்து திருமணம் செய்து கொண்டார். இச்செய்தி தெரியவந்ததும் ஆத்திரமடைந்த அப்பெண்ணின் குடும்பத்தினர், அந்த இளைஞரின் வீட்டுக்குச் சென்று அவரது தாயாரை தாக்கி இருக்கிறார்கள்.
தகவலறிந்து சம்பவ இடத்துக்குச் சென்ற போலீஸார், அப்பெண்ணை மீட்டு சிகிச்சைக்காக மருத்துவமனையில் அனுமதித்தனர். தற்போது அப்பெண் தீவிர சிகிச்சை பெற்று வருகிறார். இச்சம்பவம் தொடர்பாக 7 பேர் கைது செய்யப்பட்டிருக்கிறார்கள். நாடு முழுவதும் கடும் அதிர்வலைகளை ஏற்படுத்திய இச்சம்பவத்துக்கு பா.ஜ.க. தேசியத் தலைவர் ஜெ.பி.நட்டா கடும் கண்டனம் தெரிவித்திருக்கிறார்.
மேலும், கர்நாடகாவில் காங்கிரஸ் ஆட்சி அமைந்ததில் இருந்து இதுபோன்ற கொடூர குற்றங்கள் குறிப்பாக, பெண்களுக்கு எதிரான குற்றங்கள் அடிக்கடி நடப்பதாகவும் குற்றம்சாட்டினார். அதோடு, இச்சம்பவத்தின் உண்மைத்தன்மை குறித்து விசாரித்து அறிக்கை அளிக்க 5 நபர் கொண்ட குழு ஒன்றையும் அமைத்து ஜெ.பி.நட்டா உத்தரவிட்டிருக்கிறார்.
இக்குழுவில் பா.ஜ.க. பெண் எம்.பி.க்கள் அபரஜிதா சாரங்கி, சுனிதா துகல், லாக்கெட் சாட்டர்ஜி, ரஞ்சிதா கோலி ஆகியோரும், பா.ஜ.க. தேசியச் செயலாளர் அஷா லக்ராவும் இடம்பெற்றிருக்கிறார்கள்.
