நெல்லை இரயில் நிலையத்தில் வெள்ளம் வடிந்ததைத் தொடர்ந்து, இன்று இரயில் சேவை மீண்டும் தொடங்கப்பட்டுள்ளது.
கடந்த சில நாட்களுக்கு முன் தென் தமிழகத்தின் அநேக இடங்களில் பரவலாக கனமழை பெய்தது. குறிப்பாக கடந்த 17 மற்றும் 18-ஆம் தேதிகளில் திருநெல்வேலி, தூத்துக்குடி, தென்காசி, கன்னியாகுமரி மாவட்டங்களில் அதி கனமழை வெளுத்து வாங்கியது.
கால் நூற்றாண்டுகளுக்குப் பிறகு பெய்த அதி கனமழையால், தாமிரபரணி ஆற்றில் வரலாறு காணாத அளவில் வெள்ளப்பெருக்கு ஏற்பட்டது. இதனால், தாமிரபரணி கரையோரப் பகுதிகளில் உள்ள கிராமங்களை வெள்ளம் சூழ்ந்தது. இதனால், பொதுமக்களின் இயல்பு வாழ்க்கை கடுமையாக பாதிக்கப்பட்டது.
இடைவிடாது பெய்த கனமழையால், தூத்துக்குடியின் முக்கிய சாலைகள் மற்றும் இரயில் நிலையங்களையும் வெள்ளம் சூழ்ந்தது. இதன் காரணமாக, கடந்த ஞாயிற்றுக்கிழமை முதல் நெல்லையில் இரயில் சேவை நிறுத்தப்பட்டது.
இந்நிலையில், தூத்துக்குடியில் மழை தற்போது ஓய்ந்துள்ளது. இரயில் நிலையங்களில் தேங்கியிருந்த வெள்ளம் வடிந்ததைத் தொடர்ந்து, 3 நாட்களுக்குப் பிறகு இரயில் சேவை இன்று மீண்டும் தொடங்கியது. அதன்படி வந்தே பாரத் உள்ளிட்ட சில இரயில் சேவைகள் படிப்படியாக இயக்கப்படும் என தெற்கு இரயில்வே தெரிவித்துள்ளது.
