அணுசக்தித் திறனை உயர்த்த நடவடிக்கை: மத்திய அமைச்சர் தகவல்!

அணுசக்தித் திறனை 7,480 மெகா வாட்டிலிருந்து 2031-32-ம் ஆண்டுக்குள் 22,480 மெகா வாட்டாக உயர்த்துவதற்கான நடவடிக்கைகளை மத்திய அரசு தொடங்கி இருப்பதாக அணு ஆற்றல் மற்றும் விண்வெளித் துறை இணையமைச்சர் டாக்டர் ஜிதேந்திர சிங் தெரிவித்திருக்கிறார்.

நாடாளுமன்ற குளிர்காலக் கூட்டத்தொடர் கடந்த 4-ம் தேதி தொடங்கி நடந்து வருகிறது. இக்கூட்டத்தொடரில் பல்வேறு மசோதாக்கள் தாக்கல் செய்யப்பட்டு, பரிசீலனைக்கு எடுத்துக் கொள்ளப்பட்டு, விவாதத்திற்குப் பிறகு நிறைவேற்றப்பட்டு வருகின்றன. மேலும், கேள்வி நேரமும் நடைபெற்று வருகிறது.

இந்த சூழலில், கேள்வி நேரத்தின்போது அணுசக்தி தொடர்பாக மக்களவையில் கேள்வி எழுப்பப்பட்டது. இதற்கு, அணு ஆற்றல் மற்றும் விண்வெளித் துறை இணையமைச்சர் டாக்டர் ஜிதேந்திர சிங் எழுத்துப்பூர்வமாக பதில் அளித்திருக்கிறார்.

அதில் அமைச்சர் ஜிதேந்திர சிங், “2013-14-ல் அணுமின் நிலையங்களில் இருந்து ஆண்டுக்கு 35,334 மில்லியன் யூனிட்டுகளாக இருந்த மின் உற்பத்தி 2022-23-ல் 46,982 மில்லியன் யூனிட்டாக அதிகரித்திருக்கிறது. அதேபோல, 2013-14-ல் 4,780 மெகா வாட்டாக இருந்த நிறுவப்பட்ட அணுமின் திறன், தற்போது 7,480 மெகா வாட்டை எட்டி இருக்கிறது.

தற்போது 23 அணு உலைகள் நிறுவப்பட்டுள்ளது. குஜராத், ராஜஸ்தான், தமிழகம், ஹரியானா, கர்நாடகா மற்றும் மத்தியப் பிரதேசம் ஆகிய மாநிலங்களில் மொத்தம் 8,000 மெகா வாட் திறன் கொண்ட 10 அணு உலைகளின் கட்டுமானப் பணிகள் நடைபெற்று வருகின்றன.

மேலும், அரசாங்கத்தால் அனுமதிக்கப்பட்ட 10 அணு உலைகள் தொடர்பான திட்டத்திற்கு முந்தைய நடவடிக்கைகள் தொடங்கப்பட்டிருக்கின்றன. இவற்றை, 2031-32-க்குள் படிப்படியாக முடிக்கத் திட்டமிடப்பட்டிருக்கிறது. கடந்த 10 ஆண்டுகளில் நாட்டில் அணு மின் உற்பத்தி தொடர்ந்து சிறந்த பாதுகாப்பை வெளிப்படுத்தி வருகிறது.

2070-க்குள் நிகர பூஜ்ஜிய பொருளாதாரம் என்ற இலக்கை எட்டுவதற்கு, அணுசக்தி திறனை விரிவாக்குவது நாட்டின் ஆற்றல் மாற்றத்திற்கு உதவும். மேலும், டி.பி.ஐ.ஐ.டி. ஸ்டார்ட்-அப் இந்தியா போர்ட்டலின்படி, விண்வெளி ஸ்டார்ட்-அப்களின் எண்ணிக்கை 2014-ல் ஒன்றிலிருந்து 2023-ல் 189 ஆக உயர்ந்திருக்கிறது.

இந்த ஆண்டு இந்திய விண்வெளி ஸ்டார்ட்-அப்களில் முதலீடு 124 மில்லியன் டாலர்களாக அதிகரித்திருக்கிறது. இந்திய விண்வெளிப் பொருளாதாரத்தின் தற்போதைய அளவு சுமார் 8.4 பில்லியன் டாலர்கள் என மதிப்பிடப்பட்டிருக்கிறது. இது உலக விண்வெளிப் பொருளாதாரத்தில் 2 முதல் 3 சதவீதம் வரை இருக்கும்.

இந்திய விண்வெளிக் கொள்கை 2023-ன் அமலாக்கத்தின் மூலம் இந்திய விண்வெளி 2033-க்குள் 44 பில்லியன் டாலர்கள் பொருளாதாரத்தை அடைய முடியும்” என்றார்.