மிட்ஷி இந்தியா நிறுவனத்தின் CFO ரிங்கு பட்டேல் தனது ராஜினாமா கடிதத்தைக் காகிதத்தில் கையால் எழுதிக் கொடுத்துள்ளார், இந்த கடிதம் சமூக வலைத்தளத்தில் வைரலாகிவருகிறது.
காலம் மாறுவது போல் மனிதர்களும், கலாச்சாரங்களும் மாறிக்கொண்டே வருகிறது. தொழில் நுட்பத்தின் தாக்கமும் அதிகமாகிக் கொண்டே வருகிறது. இன்றைய காலகட்டத்தில் எல்லாமே டிஜிட்டல் மயமாகிவிட்டது.
இணையம் மூலமாகவே பல்வேறு வேலைகளை அமர்ந்த இடத்திலிருந்தே முடித்துவிடலாம். குறிப்பாக, கடிதம் அனுப்புவது போன்ற விஷயங்கள் இப்போது இல்லை.
அலுவலகங்களில் வேலைக்குச் சேருவது முதல் வேலையை விட்டு வெளியேறுவதை டிஜிட்டல் முறையில் கடிதம் அனுப்பும் பழக்கம் வந்துவிட்டது. ஆனால் இப்போது பிரபல நிறுவனம் ஒன்றில் பணியாற்றும் உயரதிகாரியின் கடிதம் சமூக வலைத்தளங்களில் வைரலாகியுள்ளது.
மிட்ஷி இந்தியா நிறுவனத்தின் CFO ரிங்கு பட்டேல் தனது ராஜினாமா கடிதத்தைக் காகித வடிவில் எழுதிக் கொடுத்துள்ளார். கையால் எழுதப்பட்ட இந்த ராஜினாமா கடிதம் தற்போது சமூக வலைத்தளங்களில் வைரலாகி வருகிறது.
ரிங்கு படேல் நோட்புக் ஒன்றிலிருந்து ஒரு காகிதத்தை எடுத்து அதில் தன் ராஜினாமா கடிதத்தை எழுதியுள்ளார். ரிங்கு படேல் தனிப்பட்ட காரணங்களுக்காக ராஜினாமா செய்துள்ளார்.
அவர் தனது ராஜினாமா கடிதத்தில், “தனிப்பட்ட காரணங்களுக்காக, CFO பணியிலிருந்து உடனடியாக வெளியேறுகிறேன் என்பதைத் தாழ்மையுடன் தெரிவித்துக் கொள்கிறேன். இந்த நிறுவனத்தில் எனது அனுபவம் மிகவும் சிறப்பாக இருந்தது” என்று எழுதியுள்ளார்.
ரிங்கு படேலின் ராஜினாமா கடிதத்தை உடனடியாக ஏற்றுக்கொண்டதாகவும், அவருக்குப் பதிலாக மற்றொரு அதிகாரியை வேலைக்குச் சேர்க்கும் செயல்முறை நடந்து வருவதாகவும் மிட்ஷி இந்தியா நிறுவனம் தெரிவித்துள்ளது.
