டென்னிஸ் போட்டியில் இரட்டையர் தரவரிசையில் முன்னாள் நம்பர் 1 வீராங்கனையான பிரிட்டனைச் சேர்ந்த தாரா மூர் ஊக்கமருந்து குற்றத்திலிருந்து விடுவிக்கப்பட்டுள்ளார்.
2022ஆம் ஆண்டு டென்னிஸ் போட்டியின் முன்னாள் நம்பர் 1 வீராங்கனையான பிரிட்டன் நாட்டை சேர்ந்த தாரா மூர் தடைசெய்யப்பட்ட ஊக்கமருந்தைப் பயன்படுத்தியதாக அவர்மீது குற்றச்சாட்டு எழுந்தது.
மேலும் அவரிடம் இருந்து பெற்ற மாதிரியைச் சோதனை செய்ததில் தடைசெய்யப்பட்ட ஊக்கமருந்தைப் பயன்படுத்தியதாக அவர் டென்னிஸ் போட்டிகளில் பங்கேற்கத் தற்காலிகமாகத் தடை விதிக்கப்பட்டது.
அவரது மாதிரியில் நான்ட்ரோலோன் மற்றும் போல்டெனோன் இருந்ததாகச் சோதனையில் தெரியவந்தது. அந்த இரண்டும் தடைசெய்யப்பட்ட பட்டியலில் உள்ளன. மூர் இந்த தடையை எதிர்த்து மேல் முறையீடு செய்தார்.
இந்நிலையில் சர்வதேச டென்னிஸ் ஒருமைப்பாடு நிறுவனம் நடத்திய விசாரணையில் அவர் குற்றமற்றவர் என்று தெரியவந்துள்ளது. உடனடியாக அவர் மீது விதிக்கப்பட்ட தற்காலிக இடைநீக்கத்தை ரத்து செய்து சர்வதேச டென்னிஸ் ஒருமைப்பாடு நிறுவனம் அறிவித்துள்ளது.
