விஜயகாந்த் ஒரு சகாப்தம். அந்த சகாப்தம் முடிந்து விட்டது. கண்ணீர் சிந்துவதைத் தவிர எனக்கு வேறு மொழி தெரியவில்லை என்று இயக்குநர் எஸ்.ஏ.சந்திரசேகர் தனது இரங்கல் செய்தியில் தெரிவித்திருக்கிறார்.
நடிகரும், தே.மு.தி.க. தலைவருமான விஜயகாந்த் உடல்நலக் குறைவு காரணமாக நேற்று காலை உயிரிழந்தார். அவரது மறைவுக்கு அரசியல் கட்சிகளின் தலைவர்கள், திரையுலகினர், பொதுமக்கள், ரசிகர்கள், தொண்டர்கள் என பல்வேறு தரப்பினரும் நேரிலும், சமூக வலைத்தளங்கள் மூலமும் இரங்கல் தெரிவித்து வருகின்றனர்.
அந்த வகையில், இயக்குநர் எஸ் .ஏ.சந்திரசேகர் வெளியிட்டிருக்கும் இரங்கல் செய்தியில், “எனது இனிய நண்பர் விஜயகாந்த் அவர்களை உயிரோடு இருக்கும்போதே சந்தித்து ஆரத் தழுவி, கட்டி அணைத்து முத்தமிட வேண்டும் என்று நான் ஆசைப்பட்டேன்.
அதற்காக நான் 2 ஆண்டுகள் முயற்சியும் செய்தேன். ஆனால், அந்த வாய்ப்பு எனக்குக் கிடைக்கவில்லை. அவரது உயிரற்ற உடலை நான் பார்க்கக் கூடாது என்று கடவுள் நினைத்தாரோ என்னவோ நான் அவரைப் பார்க்க முடியாத நிலையில் இருக்கிறேன்.
இந்த நாளில் நான் துபாயில் இருக்கிறேன். திரையுலகிலும் சரி, அரசியல் உலகிலும் சரி, அவர் சகாப்தம் படைத்தவர். அந்த சகாப்தம் முடிந்து விட்டது. இந்த நிலையில், கண்ணீர் சிந்துவதைத் தவிர எனக்கு வேறு மொழி தெரியவில்லை.
அவரது மறைவுக்கு எனது ஆழ்ந்த இரங்கலைத் தெரிவித்துக் கொள்கிறேன். எனது அஞ்சலியுடன் அவரது ஆத்மா சாந்தி அடைய நான் இறைவனை வேண்டிக்கொள்கிறேன்” என்று தெரிவித்திருக்கிறார்.
