விஜயகாந்த் உடலுக்கு ரஜினிகாந்த் நேரில் அஞ்சலி!

நடிகரும், தே.மு.தி.க. தலைவருமான விஜயகாந்த் உடலுக்கு, சூப்பர் ஸ்டார் ரஜினிகாந்த் நேரில் வந்து அஞ்சலி செலுத்தினார்.

நடிகரும், தே.மு.தி.க. தலைவருமான விஜயகாந்த், உடல்நலக் குறைவு காரணமாக நேற்று காலை உயிரிழந்தார். அவரது உடல் தீவுத்திடலில் வைக்கப்பட்டிருக்கிறது. அவரது உடலுக்கு சினிமா பிரபலங்கள், அரசியல் கட்சிகளின் தலைவர்கள், கட்சித் தொண்டர்கள், ரசிகர்கள் மற்றும் பொதுமக்கள் என பல்வேறு தரப்பினரும் அஞ்சலி செலுத்தி வருகின்றனர்.

விஜயகாந்த் மறைவுக்கு அஞ்சலி செலுத்தும் வகையில், இன்று படப்பிடிப்புகள் அனைத்தும் ரத்து செய்யப்பட்டிருக்கிறது. அதேபோல, தூத்துக்குடியில் வேட்டையன் படப்பிடிப்புக்காக சென்றிருந்த நடிகர் ரஜினிகாந்தும், ஷூட்டிங் ரத்து செய்துவிட்டு சென்னை திரும்பினார்.

அப்போது, சென்னை விமான நிலையத்தில் அவர் அளித்த பேட்டியில், “விஜயகாந்த் அசாத்தியமான மன உறுதி கொண்டவர். அன்பு நண்பர் விஜயகாந்தின் மறைவு மிகப்பெரிய இழப்பு. ஆரோக்கியமாக இருந்திருந்தால், தமிழக அரசியலில் மிகப்பெரிய சக்தியாக விளங்கி இருப்பார்” என்று கூறினார்.

இந்த நிலையில், இன்று காலை தீவுத்திடலுக்குச் சென்ற ரஜினிகாந்த், அங்கு வைக்கப்பட்டிருந்த விஜயகாந்த் உடலுக்கு ரோஜாப்பூ மாலை அணிவித்து அஞ்சலி செலுத்தினார். பின்னர், செய்தியாளர்களிடம் பேசிய ரஜினி, “நட்புக்கு இலக்கணம் விஜயகாந்த்.

அவருடன் ஒரு முறை பழகிவிட்டால், வாழ்நாள் முழுவதும் அவரது அன்புக்கு அடிமையாகி விடுவார்கள். இதனால், அவருக்கு எத்தனையோ நண்பர்கள் உள்ளனர். உயிரைக் கொடுக்க கூடியவர்களும் உள்ளனர். அனைவர் மீதும் கோபப்படுவார்.

ஆனால், யாருக்கும் அவர் மீது கோபம் வராது. விஜயகாந்த் கோபத்திற்கு பின்னால் சுயநலம் இருக்காது. அன்பு இருக்கும். உடம்பு சரியில்லாமல், மருத்துவமனையில் சுயநினைவு இல்லாமல் இருக்கும்போது, நிறைய பேர் வந்தனர். மலேஷியாவில் ரசிகர்கள் என்னை சூழ்ந்து கொண்டனர். அவர்களை விரட்டி என்னை காப்பாற்றினார்.

கேப்டன் என்ற பெயர் அவருக்கு பொருத்தமான பெயர். வாழ்க்கையில் எத்தனையோ ரன் எடுத்து 71-ல் முடிந்து விட்டது அவரது வாழ்க்கை. வாழ்ந்தவர் கோடி மறைந்தவர் கோடி மக்கள் மனதில் நிற்பவர் யார் என்றால் அவர் விஜயகாந்த். வாழ்க விஜயகாந்த் நாமம்” என்று கூறினார்.