இந்திய சினிமாவின் முன்னணி சண்டை இயக்குனராக பணியாற்றி வரும் பீட்டர் ஹெய்ன் தற்போது திரைப்படத்தின் கதாநாயகனாக களமிறங்கவுள்ளார்.
சண்டை இயக்குனர்களான கனல் கண்ணன், ஜாக்குவார் தங்கம் அகியோரைத் தொடர்ந்து தற்போது பீட்டர் ஹெய்னும் கதாநாயகனை இணையவுள்ளார். பீட்டர் ஹெய்ன் இதுவரை 200க்கும் மேற்பட்ட படங்களுக்கு சண்டை இயக்குனராக பணியாற்றியுள்ளார்.
பீட்டர் ஹெய்ன் நடிக்கும் படத்தை ரெண்ட்ஸ் சினிமாஸ் சார்பில் ஜெ.எம்.பஷீர் மற்றும் எம்.டி சினிமாஸ் சார்பில் ஏ.எம் சவுத்ரி தயாரிக்கிறார்கள். மா.வெற்றி என்ற புதுமுகம் இயக்குனர் இயக்குகிறார்.
இதுகுறித்து தயாரிப்பாளர் ஜே.எம்.பஷீர், ” நானும் என் நண்பர் சவுத்ரியும் இணைந்து மாஸ்டர் பீட்டர் ஹெயினை வைத்து ஒரு பிரம்மாண்ட ஆக்ஷன் படம் எடுக்க வேண்டும் எனப் பல காலமாகப் பேசி வந்தோம். இந்தியாவில் உருவான பாகுபலி, ஆர்ஆர்ஆர் போன்ற படங்களில் மாஸ்டரின் பங்கு உள்ளது.
உலகளவில் இந்திய சினிமாவை அறிய வைத்தவர், அவரை கவுரவிக்க வேண்டும் என ஆசைப்பட்டோம். இவரை வைத்து பெரிய அளவில் ஒரு படத்தைத் தயாரிக்கவுள்ளோம். படம் மிகப்பெரும் பொருட்செலவில் முன்னணி கலைஞர்களுடன் உருவாகவுள்ளது.
எங்களுக்கு இயக்குனர் வெற்றியை ரொம்ப காலமாகத் தெரியும். அவர் மாஸ்டரை கவரும்படி ஒரு கதையைச் சொல்லியுள்ளார். சினிமாவில் உலகளவில் மொழிகள் தாண்டி ரசிக்கப்படுவது ஆக்ஷன் படம், காமெடிப்படம். அந்த வகையில் மாஸ்டரை வைத்து பெரிய ஆக்ஷன் படம் தயாரிக்கவிருக்கிறோம். உலகமே வியக்கும் சாதனைகள் செய்த மாஸ்டர் உடன் இணைந்து பணியாற்றுவது மகிழ்ச்சி” எனக் கூறினார்.
அவரைத் தொடரந்துப் பேசிய படத்தின் நாயகன் பிரபல ஸ்டண்ட் இயக்குநர் பீட்டர் ஹெய்ன், “இயக்குநர் வெற்றி, முதலில் ஒரு ஐடியாவாகத்தான் இதைச் சொன்னார். பிறகு நான் நடிக்க வேண்டும் என்று கூறினார். நீங்கள்தான் இப்படத்திற்குப் பொருத்தமாக இருப்பீர்கள் என்றும் கூறினார்” என தெரிவித்தார்.
மேலும், இப்படத்தில் தான் காட்டுவாசியாக நடிக்க உள்ளதாகவும், இப்படத்தில் நடிக்க, தான் தனியாக பயிற்சி எடுத்து வருவதாகவும் தெரிவித்த அவர், படத்தின் இசையமைப்பாளராக ஏ.ஆர்.ரஹ்மானை படக்குழு அணுகவுள்ளதாகவும் தெரிவித்தார். மேலும், படத்தில் முன்னணி நட்சத்திரங்கள், தொழில் நுட்பக் கலைஞர்கள் பணியாற்ற உள்ளதாகவும், அது பற்றிய விவரங்கள் விரைவில் அதிகாரப்பூர்வமாக அறிவிக்கப்படும் என்று கூறினார்.
