சர்வதேச கிரிக்கெட்டில் இருந்து டீன் எல்கர் ஓய்வு பெற்ற நிலையில் தற்போது தென் ஆப்பிரிக்கா அணியின் மற்றொரு வீரர் சர்வதேச டெஸ்ட் போட்டியில் இருந்து ஓய்வு அறிவித்துள்ளார்.
இந்தியா – தென் ஆப்பிரிக்கா அணிகளுக்கு இடையேயான டெஸ்ட் கிரிக்கெட் முடிந்தவுடன் சர்வதேச கிரிக்கெட்டில் இருந்து டீன் எல்கர் ஓய்வு பெற்றார்.
இந்நிலையில் தென் ஆப்பிரிக்கா ரசிகர்களுக்கு மேலும் அதிர்ச்சி தரும் விதமாக அந்த அணியின் முன்னணி விக்கெட் கீப்பர் ஹென்ரிச் கிளாசனும் டெஸ்ட் கிரிக்கெட்டில் இருந்து ஓய்வு பெறுவதாக அறிவித்துள்ளார்.
ஆனால் ஒருநாள் மற்றும் டி20 கிரிக்கெட்டில் தொடர்ந்து விளையாடுவேன் என தெரிவித்துள்ளார். 32 வயதான ஹென்ரிச் கிளாசன் தென் ஆப்பிரிக்க அணிக்காக இதுவரை 4 டெஸ்ட் போட்டிகளில் விளையாடி 104 ரன்கள் அடித்துள்ளார்.
இவர் கடந்த 2019ஆம் ஆண்டில் இந்திய அணிக்கு எதிரான டெஸ்ட் போட்டியில் அறிமுகம் ஆனார். கடைசியாக இவர் கடந்த ஆண்டு வெஸ்ட் இண்டீஸ்க்கு எதிரான டெஸ்ட் போட்டியில் விளையாடினார்.
ஏற்கனவே, தென் ஆப்பிரிக்க அணியின் அதிரடி தொடக்க வீரரான டி காக் கடந்த 2021 டிசம்பரில் டெஸ்ட் கிரிக்கெட்டில் இருந்து ஓய்வு பெற்றார்.
இந்நிலையில் தற்போது கிளாசனும் டெஸ்ட் கிரிக்கெட்டில் இருந்து ஓய்வு பெறுவதாக அறிவித்துள்ளது ரசிகர்களுக்கு அதிர்ச்சியை ஏற்படுத்தி உள்ளது.
