அமெரிக்காவில் வீசிய சூறாவளி புயலால் சிகாகோ விமான நிலையம் உள்ளிட்ட பல்வேறு விமான நிலையங்களில் 2,000 விமானங்கள் ரத்து செய்யப்பட்டன. புயலால் பாதிக்கப்பட்ட பகுதிகளில் மீட்புப் பணிகள் முடுக்கி விடப்பட்டிருக்கிறது.
அமெரிக்காவின் சிகாகோ உள்ளிட்ட நகரங்களில் நேற்று கடுமையான சூறாவளி புயல் வீசியது. சூறாவளி காற்று மட்டுமல்லாது இடி, மின்னலுடன் பலத்த மழையும் கொட்டியது. சுமார் 75 கிலோ மீட்டர் வேகத்தில் சூறாவளி காற்று சுழன்று சுழன்று அடித்தது.
இதனால், கிரேட் லேண்ட் மற்றும் சிகாகோ தெற்குப் பகுதியில் உள்ள ஏராளமான வீடுகள் சேதமடைந்தன. மின் வினியோகமும் துண்டிக்கப்பட்டதால் 97,000 பேர் இருளில் மூழ்கித் தவித்து வருகின்றனர். புயலால் பாதிக்கப்பட்ட பகுதிகளில் மீட்புப் பணிகள் முடுக்கி விடப்பட்டிருக்கிறது.
மேலும், சூறாவளி புயல் காரணமாக, சிகாகோ விமான நிலையம் உள்ளிட்ட பல்வேறு விமான நிலையங்களில் விமான சேவை பாதிக்கப்பட்டது. 2,400 விமானங்கள் புறப்படுவதில் தாமதம் ஏற்பட்டது. சுமார் 2,000 விமானங்கள் ரத்து செய்யப்பட்டன.
இதன் காரணமாக, அமெரிக்காவில் உள்ள விமான நிலையங்களில் ஆயிரக்கணக்கான பயணிகள் தவித்து வருகிறார்கள். தவிர, பல்வேறு நகரங்களில் 2.50 லட்சத்துக்கும் மேற்பட்ட வீடுகளில் மின்சாரம் துண்டிக்கப்பட்டிப்பதால் பொதுமக்களின் இயல்பு வாழ்க்கை கடுமையாக பாதிக்கப்பட்டிருக்கிறது.
