இந்தியாவில் நடைபெற்று வரும் புரோ கபடி தொடரில் நேற்று நடைபெற்ற இரண்டு போட்டிகளில் பெங்கால் வாரியர்ஸ் மற்றும் ஜெய்ப்பூர் பிங்க் பாந்தர்ஸ் ஆகிய அணிகள் வெற்றி பெற்றது.
இந்தியாவில் உள்ள மாநிலங்களுக்கிடையே நடைபெறும் கபடி லீக் தொடரில் மொத்தம் 12 அணிகள் பங்குபெற்று விளையாடி வருகின்றன.
பெங்கால் வாரியர்ஸ், பெங்களூரு புல்ஸ், தபாங் டெல்லி கே.சி, குஜராத் ஜெயண்ட்ஸ், ஹரியானா ஸ்டீலர்ஸ், ஜெய்ப்பூர் பிங்க் பாந்தர்ஸ், பாட்னா பைரேட்ஸ், புனேரி பல்டன், தமிழ் தலைவாஸ், தெலுங்கு டைட்டன்ஸ், யு மும்பா மற்றும் உ.பி. யோதாஸ் ஆகிய அணிகள் பங்குபெற்றுள்ளனர்.
இந்நிலையில் நேற்று இரண்டு போட்டிகள் நடைபெற்றது. அதன் முதல் போட்டியில் ஜெய்ப்பூர் பிங்க் பாந்தர்ஸ் – புனேரி பல்டன் அணிகள் விளையாடின.
இந்தப் போட்டியில் முதல் பாதியில் மோசமான நிலையில் இருந்த ஜெய்ப்பூர் பிங்க் பாந்தர்ஸ் அணி இரண்டாம் பாதியில் சுதாரித்து ஆடி வெற்றி பெற்றது. அதனால், இரண்டாவது பாதி முழுவதும் பரபரப்பாக சென்றது.
ஜெய்ப்பூர் அணியின் நட்சத்திர ரெய்டர் அர்ஜுன் தேஷ்வால் இரண்டாம் பாதியில் வீறு கொண்டு எழுந்து புனேரி அணிக்கு எதிராக ரெய்டு சென்ற போதெல்லாம் புள்ளிகளை அள்ளினார். அவர் மொத்தம் 21 ரெய்டுகள் சென்று அதில் 11 ரெய்டுகளில் 16 புள்ளிகளை எடுத்தார்.
முதல் பாதியில் 11 – 20 என்ற அளவில் பின்தங்கி இருந்த ஜெய்ப்பூர் அணி, இரண்டாம் பாதியில், புனேரி அணியை முந்தியது. ஆனால், புனேரி அணியும் ஈடு கொடுத்து ஆடியதால் இரண்டாம் பாதியின் கடைசி ஐந்து நிமிடங்கள் பரபரப்பாக இருந்தன. ஆட்ட நேர முடிவில் 36 – 34 என்ற புள்ளிக் கணக்கில் ஜெய்ப்பூர் பிங்க் பாந்தர்ஸ் அணி வெற்றி பெற்றது.
இதனைத் தொடர்ந்து நடைபெற்ற மற்றொரு போட்டியில் உ.பி. யோதாஸ் – பெங்கால் வாரியர்ஸ் அணிகள் விளையாடின. இந்த போட்டியில் பெங்கால் வாரியர்ஸ் அணி 42-37 என்ற கணக்கில் வெற்றி பெற்றது.
இந்த போட்டியில் மூலம் பெங்கால் வாரியர்ஸ் அணி 7வது இடத்துக்கு முன்னேறியுள்ளது.
