மலேசியா ஓபன் சர்வதேச பேட்மிண்டன் போட்டியில் இரட்டையர் பிரிவில் இந்திய அணியின் சாத்விக் சாய்ராஜ் ரங்கிரெட்டி- சிராக் ஷெட்டி ஜோடி வெற்றி பெற்று இறுதிப்போட்டிக்கு முன்னேறியுள்ளது.
கோலாலம்பூரில் மலேசியா ஓபன் சர்வதேச பேட்மிண்டன் போட்டி நடைபெற்று வருகிறது. இதில் ஆண்கள் இரட்டையர் பிரிவின் அரையிறுதி போட்டி நேற்று நடைபெற்றது.
இதில் இந்திய அணியின் சார்பாக சாத்விக் சாய்ராஜ் ரங்கி ரெட்டி – சிராக் ஷெட்டி ஜோடி பங்குபெற்றனர். உலக தரவரிசையில் இரண்டாவது இடம் வகிக்கும் சாத்விக் சாய்ராஜ் ரங்கி ரெட்டி – சிராக் ஷெட்டி இணை,
உலக தரவரிசையில் மூன்றாவது இடம் வகிக்கும் தென் கொரியாவின் காங் மின் ஹியுக் – சியோ சியுங் ஜே ஜோடியுடன் விளையாடியது.
விறுவிறுப்பாக நடைபெற்ற இந்த ஆட்டத்தில் சாத்விக் – சிராக் ஷெட்டி ஜோடி, 21-18, 22-20 என்ற செட் கணக்கில் காங் – சியோ ஜோடியை வீழ்த்தி இறுதிப்போட்டிக்குள் நுழைந்தது.
மலேசிய ஓபன் பேட்மிண்டன் இறுதிப்போட்டிக்கு தகுதி பெற்ற முதல் இந்திய ஜோடி சாத்விக் – சிராக் ஷெட்டி தான் என்ற பெருமையை இவர்கள் பெற்றுள்ளனர்.
